Udhëheqësi i konservatorëve gjermanë Laschet jep dorëheqjen si kryeministër North Rhine-Westphalia

Politikani konservator gjerman Armin Laschet, i cili në një moment u pa si kandidati kryesor për t’u bërë kancelar i ardhshëm i vendit, dha zyrtarisht dorëheqjen nga zyra e tij si kryeministër i North Rhine-Westphalia të hënën në mëngjes.

Sipas mediave të huaja, përcjell Telegrafi, 60-vjeçari kishte njoftuar përpara zgjedhjeve kombëtare në shtator se do të tërhiqej nga posti i kryeministrit të shtetit, edhe nëse nuk do të bëhej kancelari i ardhshëm i Gjermanisë.

Laschet do të mbetet kryeministër në detyrë derisa të zërë vendin e tij si deputet i parlamentit të ardhshëm gjerman, ose Bundestagut, në seancën e tij inauguruese të martën.

Të mërkurën, ministri i Transportit të North Rhine Westphalia, Hendrik Wuest pritet të zgjidhet kryeministri i ri i shtetit në një seancë të posaçme të parlamentit të shtetit.

Me Laschet si kandidat për kancelar, CDU dhe aleatët e saj bavarez, Unioni Kristian Social (CSU), arritën një rezultat historikisht të keq në zgjedhje.

Ata humbën përballë socialdemokratëve, kandidati i të cilëve Olaf Scholz po negocion me dy parti të tjera për të formuar një qeveri të qendrës së majtë pas 16 vitesh nën kancelaren e qendrës së djathtë Angela Merkel. /Telegrafi/