“Luftën me kancerin e gjirit, ju ndihmojmë ne ta tejkaloni” – vajzat e Telegrafit sjellin mesazhe sensibilizuese për muajin ‘rozë’

Tetori, në të gjithë botën është muaji i ndërgjegjësimit për zbulimin e hershëm të kancerit të gjirit.

Ky muaj është një fushatë vjetore ndërkombëtare që synon të shpërndajë informacion dhe të edukojë njerëzit për rëndësinë e shëndetit, zbulimin e hershëm të kancerit të gjirit te gratë dhe vajzat në të gjithë botën.

Por, çfarë është kanceri i gjirit?

Kanceri i gjirit është një sëmundje ku qelizat e gjirit rriten jashtë kontrollit.

Kanceri i gjirit mund të fillojë në pjesë të ndryshme të gjirit dhe mund të përhapet jashtë tij nëpërmjet enëve të gjakut dhe enëve limfatike, pra duke dhënë metastaza.

Të dy gjinitë, si gratë ashtu edhe burrat mund të preken nga kanceri i gjirit, edhe pse ky kancer është shumë më i zakonshëm te gratë.

Disa gra janë në rrezik më të lartë për kancerin e gjirit sesa disa të tjera për shkak të historisë së tyre mjekësore, personale, familjare, ose për shkak të ndryshimeve të caktuara gjenetike.

Sa i përhapur është kanceri i gjirit?

Bazuar në të dhënat e Agjencisë Ndërkombëtare mbi Kërkimet mbi Kancerin në Botë (GLOBOCAN), e cila përllogarit një vlerësim të situatës reale në çdo vend të botës, kanceri i gjirit ka përqindje më të lartë ndër llojet e kancerit që prekin gratë kudo në botë.

Me qëllim sensibilizimi, edhe ketë vit Telegrafi i është bashkuar fushatës për muajin e ndërgjegjësimit të kancerit të gjirit duke sjellë disa mesazhe me qëllim motivimin dhe rritjen e ndërgjegjësimit për femrat që po e kalojnë këtë betejë dhe ato për të cilat rrezikojnë që me të njëjtën sfidë të përballen edhe nesër.

Më poshtë mund ta ndiqni videon e realizuar me shumë dashuri nga vajzat e stafit të Telegrafit për të gjitha femrat: