Haradinaj: E mirëpres “Ballkanin e Hapur”, por pas njohjes nga Serbia

Kryeministri i Shqipërisë, Edi Rama, ka zhvilluar këtë të hënë një takim edhe me kryetarin e Aleancës për Ardhmërinë e Kosovës, Ramush Haradinaj.

Ky i fundit tha se me Ramën biseduan për situatën në veri dhe për hekurudhën Kosovë – Shqipëri, teksa tha se e përkrahë nismën “Open Ballkan” por pas njohjes nga Serbia.

Haradinaj në një prononcim për media pas takimit me kryeministrin Rama tha se vizita e këtij të fundit është e rëndësishme, marrë parasysh protestat e serbëve në veri të vendit kundër reciprocitetit në targa.

Ai tha se ka kërkuar nga Rama finalizimin e hekurudhës Kosovë – Shqipëri, e cila siç tha ai, është shumë e nevojshme për zhvillimin ekonomik dhe për sigurinë.

“Z. Edi Ramën e falënderova për ardhjen në Kosovë në një kohë që është e ndjeshme, ka shumë zhvillime në Kosovë dhe rajon. E shfrytëzova rastin me i diskutu edhe temat aktuale. Pos situatës në veri, vëmendje të veçantë i kam kushtuar hekurudhës për Shqipëri, Kosovë – Shqipëri, Hekurudha është shumë e nevojshme për temat ekonomike por edhe për ato të sigurisë në të ardhmen. Mendoj që është momenti i duhur që të veprohet në këtë drejtim”, tha ai.

Ndonëse tha se nuk biseduan për nismën “Open Ballkan”, Haradinaj tha se e përkrahë atë pas njohjes së pavarësisë së Kosovës nga Serbia.

“Nuk patëm rast me e diskutu këtë. Unë e pëlqej këtë idenë e ‘Ballkanit të hapur’, e mirëpres pas njohjes së pavarësisë së Kosovës nga Serbia, do të ishte diçka e mirë por vjen pas njohjes”, tha ai.

I pari i AAK-së nuk është përgjigjur në pyetjen e gazetarëve se a është ky takimi i parë me Edi Ramën, prej kur ky i fundit e pati paditë për shpifje.

Rama po qëndron sot për vizitë zyrtare në Kosovë, ku gjatë ditës ka zhvilluar takim me kryeministrin e Kosovës Albin Kurti. Po ashtu ka takuar kryetarin e PDK-së Memli Krasniqi, kryetarin e LDK-së Lumir Abdixhiku, kryetarin e AKR-së, Behgjet Pacolli dhe kryetarin e Nismës Socialdemokrate, Fatmir Limaj.