Ishte “ekspozuar ndaj diellit”, policia angleze theu xhamin e veturës në të cilën gjendeshin dy qen – dëshmitarët befasohen nga reagimi i pronarëve

Policia u detyrua të thyente një xham të makinës për të shpëtuar dy qen të mbetur brenda, derisa temperaturat jashtë arrinin deri në 24C – ndërsa pronari ankohej për dëmin.

Pamjet e bëra të shtunën në bregun e detit në Brighton, Sussex – Angli, tregojnë oficerë që hyjnë në automjetin me ngjyrë të errët, përcjell Telegrafi.

Alarmi i makinës pastaj fiket – para se të paraqiten pronarët e saj.

Një grua më vonë mund të dëgjohet duke thënë “më ke thyer dritaren” ndërsa policët i thonë asaj se ka lënë kafshët brenda.

Dhjetëra kalimtarë mund të shiheshin gjithashtu duke parë incidentin.

Dëshmitari, i cili kërkoi të mos i përmendej emri, tha se automjeti ishte parkuar, i ekspozuar në rrezet e diellit.

Por pronarët me sa duket nuk ishin të vetëdijshëm se lënia e kafshëve në makinë mund t’u shkaktonte atyre probleme serioze, tha një dëshmitar.

Madje, reagimi i tyre ka befasuar kalimtarët.

“Çfarë dreqin je duke bërë, pse ma ke thyer xhamin e makinës? Unë isha larguar vetëm për 10 minuta”, citohet të kenë thënë ata. /Telegrafi/