Real Madridi po vjen në Kosovë – në korrik hapet kampi për talentet e rinj

Gjiganti spanjoll Real Madrid hap kampin për talentët e rinj në Kosovë

Gjiganti spanjoll Real Madrid po vjen në Kosovë gjatë muajit korrik.

Kampi stërvitor nga Real Madrid Foundation Clinic, do të sjellë për herë të parë në Kosovë ekspertë spanjollë të futbollit të cilët do të ofrojnë shkëmbimin e njohurive, aftësive dhe metodave të përparuara të punës, duke u përqendruar në zhvillimin individual të futbollistëve gjatë qëndrimit të tyre në kamp.

Ky kamp stërvitor i klubit Real Madrid do të organizohet dhe zbatohet nga Zero Pozitive, në bashkëpunim me STE dhe menaxherin sportiv Robin Krasniqi, më 19-23 Korrik, 2021 në Prishtinë, në fushën sportive të klubit futbollistik 2 Korriku.

Grupmoshat prej 6-16 vjeç, në total gjithsej 150 fëmijë, të ndarë në tre seanca, në të cilat 50 pjesëmarrës do t’i zhvillojnë stërvitjet në secilën prej tyre.

Trajnimi do të zgjasë 5 ditë me radhë, me ushtrime që zgjasin rreth një orë e gjysmë dhe që do të mbikëqyren nga trajnerët e akademisë së Real Madridit dhe ndihmësve të tyre. Fëmijët pjesëmarrës që regjistrohen, përfitojnë fanellat zyrtare të kampit stërvitor dhe certifikatë të pjesëmarrjes.

Zhvillimi i trajnimeve do të fokusohet si në aspektin praktik ashtu edhe në aspektin teorik, ku aktivitetet do të bëhen sipas vlerave të dëshmuara dhe të njohura të klubit Real Madrid.