1.2 milion vaksina të Pfizer-it, MSh nuk tregon se kur do të arrijë kontingjenti i parë

Javën që lamë pas, ministri i Shëndetësisë, Arben Vitia bëri të ditur se deri në fund të këtij viti, Kosova do të pranojë 1. 2 milion doza të vaksinës kundër coronavirusit nga kompania Pfizer, pas arritjes së marrëveshjes me këtë kompani.

Ministria e Shëndetësisë, tha se ky proces ka hyrë në një dinamikë të re dhe se është duke u rritur intensiteti, duke theksuar se më 15 qershor pritet të fillojë zbatimi i Planit të Veprimit për vaksinimin në masë, për çka janë duke u bërë përgatitjet në Prishtinë dhe në të gjitha komunat e Kosovës.

Telegrafi ka kontaktuar me këshilltarin politikë të ministrit Vitia, Sami Uka rreth asaj se kur pritet që të arrij kontingjenti i parë i këtyre vaksinave në Kosovë, mirëpo i njëjtit nuk ka dhënë ndonjë datë të saktë.

“Të gjitha këto janë detaje që do të publikohen në përputhje me kontratën e nënshkruar me prodhuesin në momentin e caktuar”, tha Uka.

Lexo po ashtu Pfizer konfirmon marrëveshjen me Kosovën për vaksina

Kosova javë më parë ka pranuar një kontingjent prej mbi 100 mijë vaksinash të kompanisë Pfizer nga COVAX-i. Aktualisht, po vaksinohen personat nga mosha 65 deri në 79 vjeç, pasi u vaksinuan personat mbi 80 vjeç, ata me sëmundje kronike dhe personeli shëndetësor.

Deri më tani në Kosovë numri i qytetarëve që kanë marrë vaksinën antiCOVID-19 ka arritur në 74 mijë e 500. Për dallim nga Kosova, në Shqipëri janë vaksinuar deri më tani afro 800 mijë qytetarë.

Ndryshe, Qeveria e Kosovës ka thënë se synon që deri në fund të vitit, të vaksinojë 60 për qind të popullatës së saj.

Kujtojmë se javëve të fundit në vend ka pasur rënie të numrit të rasteve të reja me coronavirus, e po ashtu edhe i rasteve të vdekjes.

Infektologu Hamdi Ramadani, tha sot për Telegrafin se kjo rënie e rasteve, nënkupton se jemi duke shkuar drejt një stabiliteti me gjendjen epidemiologjike në vend. /Telegrafi/