Anëtarët e rinj të bordit të ARKEP-it, Kurti i quan profesionistë të fushës

Kryeministri i Kosovës, Albin Kurti ka bërë të ditur emrat e anëtarëve të rinj të bordit të Autoritetit rregullativ të komunikimeve elektronike dhe postare (ARKEP).

Kurti këtë e bëri të ditur përmes një statusi në rrjetin social në Facebook, duke thënë se janë një ekip profesionistësh në industri dhe në akademi.

“Me një ekip profesionistësh e profesionistesh me përvojë në institucione, në industri dhe në akademi, jemi të bindur që ky është Bordi më i kualifikuar që institucioni i ARKEP-it ka pasur ndonjëherë, dhe kemi besim të plotë që ky Bord do të jetësojë vizionin për zhvillimin e sektorit.

ARKEP është rregullator i komunikimeve elektronike dhe postare.

Drejt vendosjes së tij në krye të detyrës kushtetuese dhe ligjore, tash kemi përbërjen e re të Bordit të ARKEP të votuar mbrëmë në Kuvendin e Republikës:

Nazim Rahimi – Inxhinier i Postës dhe Telekomunikacionit me 19 vite përvojë në sektorin postar, në ministrinë e linjës dhe ARKEP;

Shkumbin Hamiti – inxhinier i Telekomunikacionit e Informatikës me 17 vite përvojë pune në pozita udhëheqëse në Nokia. Hulumtues në akademi e industri me 12 patente për inovacionet e tij;

Prof. Dr. Lule Ahmedi –Profesoreshë në Universitetin e Prishtinës me përvojë 25 vjeçare dhe dhjetëra publikime ndërkombëtare;

znj. Rrezarta Duraku Ajeti – Inxhiniere e Telekomunikacionit dhe Master në Administrim Biznesi, me 12 vite përvojë pune në Telekomin e Kosovës;

Arijan Qorolli – Ekonomist me 16 vite përvojë pune të analizë tregu në ARKEP”, ka shkruar Kurti. /Telegrafi/