Vaksinimi i qytetarëve sot, i organizuar dhe pa pritje të gjata

Pas ditës së djeshme, ku para palestrës sportive “1 Tetori”, kishte tollovi të madhe nga të moshuarit që kishin shkuar për tu vaksinuar, sot procesi i vaksinimit duket se ka nisur mirë.

Policia e Kosovës dhe stafi organizativ i kësaj qendre të vaksinimit nga orët e hershme të mëngjesit po presin të moshuarit të cilët janë thirrur të premtes për tu vaksinuar sot.

PK-ja ka vendosur rrethojat e hekurta për të krijuar radhët derisa qytetarët presin për t’u vaksinuar.

Telegrafi ka provuar të marrë më shumë informacione në lidhje me procesin e vaksinimin, por shefi i vaksinimit në Qendrën e Vaksinimit “1 Tetori”, Niman Bardhi tha se do të flas për medie vetëm në ora 12:20.

Edhe gjatë ditës së djeshme ishte paralajmëruar një konferencë për medie, pas tollovisë që ndodhi, por më pastaj mediat u lejuan të merrnin vetëm pamje brenda sallës.

Ndryshe, Policia jashtë qendrës në bazë të listës po lejon të moshuarit të hyjnë e të vaksinohen, teksa nuk shihet deri më tani se ka radhë të gjatë të pritjes. /Telegrafi/