Adelina Thaçi e përlotur para mediave, kujton ditët e fundit të jetës së babait dhe këshillën jetësore që i la

Është mbajtur sot (e shtunë) ceremoniae varrimit të aktorit të njohur të humorit, Rasim Thaçi – Cima.

Në prani të familjarëve dhe shumë dashamirëve, humoristi i ndjerë u varros në fshatin e tij të lindjes, Vukoc.

Në një prononcim para mediave, vajza e tij, këngëtarja e njohur Adelina Thaçi – Meta, rrëfeu momentet e fundit të jetës së babait të saj.

Lexo po ashtu I jepet lamtumira e fundit aktorit të ndjerë Rasim Thaçi - Cima

“Tashme babai ka gati katër javë që është infektuar prej virusit, dhe në momentet kur është infektuar iu ka keqësuar gjendja dhe e kemi dërguar në Infektivë, pastaj shkoi duke u përmirësuar gjendja, por pas këtij përmirësimi pati dy sulme dhe ndërroi jetë. Është shumë e vështirë të flasësh për prindin, sidomos për babin që ka qenë krenaria jonë si familje, mbështetësi im kryesor si vajzë e vetme. Por unë jam shumë e lumtur që kam pasur një baba si ai, edhe sa të jem gjallë do të mundohem edhe pse ai fizikisht nuk është më, është në zemrat tona”, ka thënë Adelina.

E bija e vetme e humoristit gjithashtu ka folur edhe për momentet e fundit të jetës së tij, dhe vështirësitë që i ishin krijuar aktorit në komunikim.

“Ne e kemi pasur një farë komunikim me sy gjithmonë, se ai kohëve të fundit s’ka mundur shumë të flas për shkak të lodhjes edhe gjendjes së rëndë se nuk ka pasur as zë, por gjithmonë kemi komunikuar me sy, normalisht jemi munduar kohëve të fundit t’i japim më shumë përkrahje morale, sepse ashtu e ka ndjerë, sikur donte të na thoshte diçka. Por unë kam qenë deri në momentet e fundit, jemi munduar t’i bëjmë të gjitha për të sikur ai që i ka bërë të gjitha për neve. Ishalla na e ka bërë hallall”, ka thënë Thaçi-Meta.

E ndër të tjera ka treguar një ndër këshillat më të vyera që ia la babai i saj, e cila ishte shprehimisht: “Bonu njeri i mirë, jep dashni se i nderumi të nderon”. /Telegrafi/