Njerëzit e moshuar ka më shumë të ngjarë të preken nga COVID-19, edhe për herë të dytë – thotë një studim i kryer në Danimarkë

Njerëzit e moshuar që janë rikuperuar nga Covid-19 nuk mund të supozojnë se janë të imunizuar nga një “sulm i dytë”, sipas një studimi të ri që tregon se ata nën-65 vjeç janë shumë më pak të ndjeshëm ndaj ri-infektimit.

Sipas The Guardian, përcjell Telegrafi, studimi i kryer në Danimarkë zbuloi se personat nën-65 vjeç kishin rreth 80% mbrojtje për të paktën gjashtë muaj nga infektimi me Covid-19 për herë të dytë. Por mbi 65 vjeç kishin vetëm 47% mbrojtje.

Autorët e hulumtimit, botuar në revistën mjekësore Lancet, thonë se kjo do të thotë se është jetike të merren masa për të mbrojtur njerëzit e moshuar, të cilët gjithashtu kanë më shumë të ngjarë të vdesin nga Covid-19.

“Studimi ynë konfirmon atë që një numër i të tjerëve duket se sugjerojnë: ri-infektimi me Covid-19 është i rrallë në njerëz të rinj, të shëndetshëm, por të moshuarit janë në rrezik më të madh për tu infektuar me të përsëri”, ka thënë Dr. Steen Ethelberg nga Statens Serum Institut në Danimarkë.

“Meqenëse njerëzit e moshuar gjithashtu kanë më shumë të ngjarë të përjetojnë simptoma të rënda të sëmundjes dhe fatkeqësisht vdesin, gjetjet tona tregojnë qartë se sa e rëndësishme është të zbatosh politika për të mbrojtur të moshuarit gjatë pandemisë”.

Ndryshe, Danimarka ka një program testimi shumë gjithëpërfshirës, me testet PCR të vëna në dispozicion për këdo që dëshiron një të tillë, pavarësisht nëse ata kanë simptoma.

Kështu, më shumë se dy të tretat e popullsisë, 4 milionë njerëz, u testuan në vitin 2020.

Studiuesit shikuan përmasat e njerëzve që dolën pozitivë në valën e parë, midis marsit dhe majit, dhe përsëri në valën e dytë, nga shtatori në dhjetor.

Ata gjithashtu shikuan infeksionet e dyta në çdo kohë gjatë pandemisë në një grup prej 2.5 milionë njerëz. /Telegrafi/