Kurti në mandatin e tij planifikon të zbatojë propozimin e një profesori nga Harvardi për arsimin në Kosovë

Lideri i Lëvizjes Vetëvendosje (LVV), Albin Kurti, gjatë një bisede që ka zhvilluar me Fernando M.Reimers, i cili është professor në Universitetin e Harvardit kanë diskutuar mbi sfidat e arsimit dhe politikat që Kurti është duke i planifikuar për mandatin e ardhshëm.

Kurti përmes një postimi në rrjetin social në Facebook ka shkruar se në mandatin e tij do të bëhen  shujtat falas për të gjithë fëmijët, eliminimi i notave për klasët fillore të ulëta, kurrikulat e reja dhe edukimi dual që ndërlidh aftësimin profesional me tregun e punës.

Kurti po ashtu tha se hulumtimet dhe librat e shumtë të profesorit Reimers përqendrohen në përgatitjen e fëmijëve dhe të rinjve për shekullin 21 përmes intervenimeve në arsimin publik.

“Diskutuam gjatë mbi sfidat e arsimit dhe politikat që i planifikojmë për mandatin e ardhshëm, duke filluar nga shujtat falas për të gjithë fëmijët, eliminimi i notave për klasët fillore të ulëta, kurrikulat e reja dhe edukimi dual që ndërlidh aftësimin profesional me tregun e punës. Në takim, Reimers theksoi rëndësinë e reformave të njëkohshme në tri sfera të jetës publike: sundimi i ligjit, ekonomia dhe arsimi. Këto të trija, kur funksionojnë siç duhet e të bashkërenduara, përbëjnë potencialin më të madh të zhvillimit në Kosovë.

E dimë se shumica e klasëve në shkolla janë të mbingarkuara, dhe një reformë që propozoi profesori Reimers e që ka funksionuar për shtetet e ngjashme është angazhimi i asistentëve për mësimdhënësit e të gjitha niveleve. Lëvizja VETËVENDOSJE! planifikon të nxit studentët më të mirë të nivelit Master të angazhohen në mësimdhënie, dhe të ofrojë përgatitje profesionale të vazhdueshme në nivel kombëtar për të gjithë”, ka shkruar Kurti në Facebook. /Telegrafi/