ASH-AAA reagon ndaj gjuhës së urrejtjes në tekstet shkollore

Koalicioni Aleanca për Shqiptarët dhe Alternativa shpreh keqardhje për gjuhën e urrejtjes, nxitjen në urrejtje ndëretnike, fashizmin dhe gjuhën denigruese në librin e Gjeografisë të vitit të dytë për gjimnazin e reformuar.

Nga atje si thonë se nuk mund të anashkalohet faktin se, në këtë mënyrë, po bëhet një përbuzje institucionale, me dijeni dhe përgjegjësi të ministrave të BDI-së, që ndër vite kanë lejuar një denigrim të tillë ndaj shqiptarëve nga institucionet shtetërore.

“Ne e përkrahim deklaratën e kryeministrit ku thotë se “maqedonasit nuk u çuan prej gjumit në vitin e largët 1944 dhe thanë se prej sot jemi maqedonas”, por ai dhe vartësit e tij, pra edhe ata argatë shqipfolës, duhet ta dinë se edhe ne shqiptarët nuk u çuam një ditë nga gjumi për të thënë se “prej sot nuk e kemi prejardhjen më prej ilirëve, por prej çerkezëve, romëve dhe turqve’, siç dëshiron ai t’ua mësojë fëmijëve maqedonas, shqiptarë dhe të tjerëve RMV. Ne nuk u zgjuam një ditë nga gjumi dhe qytetin ku u krijua alfabet i gjuhës shqipe, pra Manastirin, ta quajmë Bitolla, sepse institucioneve shtetërore nuk u pëlqyeka të quhet Manastir ose të pranojmë se kemi ardhur nga mali vetëm sepse dikush dëshiron të krijojë “Enciklopedi nacionale” dhe për këtë u pengojnë bashkëqytetarët e tyre shqiptarë.

Koalicioni Aleanca për Shqiptarët dhe Alternativa duke marrë parasysh se flitet për reforma dhe koncept të ri për arsim fillor, ku rol primar do të ketë integrimi i lëndëve dhe botimi i librave të rinj kërkojmë, kërkon:

Të bëhet ndryshimi dhe plotësimi i ligjit për librat shkollorë. Konceptimi i librave shkollorë për nxënësit shqiptarë të realizohet nga autorë shqiptarë, duke marrë parasysh se gjuha shqipe është zyrtare dhe kemi kuadër profesional për këtë (mos të harrojmë se kemi universitete publike, ku krijohen kuadro për arsim fillor dhe të mesëm, dhe konkursi për librat e rinj të ketë formën ku do të pranohen minimum dy libra më të mirë nga dy gjuhët, që pastaj të mund të gërshetohen temat nga komisioni multietnik për cilësi më të mirë të librit”, thuhet në reagimin e ASH-AAA.

Nga ASH-AAA theksojnë se librat shkollorë janë mjete për ta njohur kulturën, traditën dhe identitetin e njëri-tjetrit e jo për ta mohuar e shtrembëruar atë me qasje destruktive.

Nga atje u bëjnë thirrje edhe profesionistëve, autorëve, përkthyese dhe redaktorëve shqiptarë, që mos bien pre e manipulimeve të këtilla dashakeqe për asnjë çmim t’i vendosin emrat e tyre nëpër libra të tillë, sepse ashtu bëjnë një krim në të cilin marrin përgjegjësi me përmasa historike./Telegrafi/