Presidenti brazilian: Vaksina kundër COVID-19 mund t’ju shndërrojë në krokodil

Presidenti brazilian, Jair Bolsonaro, ka nisur një sulm ndaj vaksinave të coronavirusit, madje duke sugjeruar që ajo e zhvilluar nga Pfizer-BioNTech mund t’i kthejë njerëzit në krokodila ose në zonja me mjekër.

Sipas medieve të huaja, përcjell Telegrafi, udhëheqësi i ekstremit të djathtë ka qenë skeptik ndaj coronavirusit që kur u shfaq për herë të parë, duke e quajtur atë si “grip të zakonshëm”.

Këtë javë ai këmbënguli se nuk do të vaksinohej madje edhe kur lansoi programin e vaksinimit masiv në vend.

“Në kontratën e Pfizer gjithçka është shumë e qartë: ne nuk jemi përgjegjës për ndonjë efekt anësor. Nëse shndërrohesh në një krokodil, është problemi yt”, tha Bolsonaro të enjten.

Kjo vaksinë i është nënshtruar testeve në Brazil për javë të tëra dhe tashmë po përdoret në Shtetet e Bashkuara dhe në Britani të Madhe.

“Nëse një gruaje i rritet mjekra ose nëse një burrë fillon të flasë me një zë të femrës, ata nuk do të kenë të bëjnë fare me këtë gjë”, tha ai, duke iu referuar prodhuesve të ilaçeve. /Telegrafi/