Ndërpritet seanca, Vetëvendosje ‘proteston’ kundër pranisë së Selmanajt në Kuvend

E plotësuar: Nënkryetarja e Kuvendit të Kosovës, Arbërie Nagavci ka ndërprerë punimet e seancës, pasi lëvizja Vetëvendosje pamundësoi vazhdimin e saj, pasi brohoritnin “jashtë jashtë”, duke mos u pajtuar me praninë e zëvendëskryeministrit Driton Selmanaj në kuvend.

Nagavci tha se nuk mund të vazhdohet në këtë mënyrë dhe ndërpreu seancën.

Ajo tha se pasi të mbahet një mbledhje e Kryesisë së Kuvendit do të vendoset rreth kësaj seance.

Vetëvendosje sërish pamundëson mbajtjen e seancës

E plotësuar: Megjithëse seanca e Kuvendit të Kosovës nisi në ora 14:30, deputetët e Kuvendit të Kosovës nga radhët e Lëvizjes Vetëvendosje pamundësuan vazhdimin e seancës, duke brohoritur “jashtë jashtë”.

Të pranishëm në seancë ishin 62 deputetë.

“Ju lutem të krijoni kushte që të vazhdojmë me seancë plenare”, tha nënkryetarja e Kuvendit, Arbërie Nagavci.

Pas kësaj, Nagavci sërish dha pauzë, duke ftuar shefat e grupeve parlamentare për konsultim.

Shtyhet seanca e re e Kuvendit për në 14:30, nuk ka kuorum

Megjithëse ishte planifikuar që të nisë seanca e re e Kuvendit të Kosovës në ora 14:00 në mungesë të kuorumit u shty për në ora 14:30.

Të pranishëm në sallë ishin vetëm 34 deputetë.

Ndryshe, Kuvendi sot ka ndërprerë edhe vazhdimin e seancës që nisi në orët e paradites pasi deputetët e Lëvizjes Vetëvendosje nuk lejuan zëvendëskryeministrin Driton Selmanaj të jetë në seancë.

Nga LVV kanë thënë se do t’i pengojnë edhe seancat tjera në qoftë se në sallë është i pranishëm Selmanaj.

Ndërkaq, edhe seanca e re e planifikuar për në ora 14:00 u shty për 30 minuta por për mungesë kuorumi.

Rendi i ditës:

Deklarimet jashtë rendit të ditës,

Pyetjet parlamentare,

Miratimi i procesverbaleve nga seancat e mëparshme,

Interpelanca me Kryeministrin e Republikës së Kosovës, z. Avdullah Hoti, sipas kërkesës së deputetit Liburn Aliu, mbështetur edhe nga 6 deputetë të Grupit Parlamentar të Lëvizjes Vetëvendosje për çështjen: “Përfshirja dhe ndarja e Liqenit të Ujmanit me Serbinë në dokumentin e zotimeve të 4 shtatorit 2020”,

Shqyrtimi i dytë i Projektligjit nr. 07/L-029 për ndryshimin dhe plotësimin e Ligjit nr. 04/L-089 për deminim humanitar,

Shqyrtimi i Raportit të Komisionit Qendror të Zgjedhjeve për vitin 2019,

Shqyrtimi i Kërkesës së Fondit të Kursimeve Personale të Kosovës për miratimin e taksave vjetore për vitin 2021,

Shqyrtimi i Raportit Vjetor të Agjencisë Kundër Korrupsionit  për vitin 2019,

Shqyrtimi i Raportit Vjetor i Komisionit për Ndihmë Shtetërorë për vitin 2019. /Telegrafi/