Kina rrit përdorimin e teknologjisë për ‘modifikimin e motit’, por kjo mund të shkaktojë fërkime me vendet e tjera

Zyrtarët kinezë kanë thënë se do të zgjerojnë përdorimin e tyre të teknologjisë për “modifikimin e motit” gjatë dekadave të ardhshme.

Në një lëvizje që tingëllon sikur erdhi nga një komplot fantastiko-shkencor, Kina ka teknologji që shpërthen molekulat e argjendit në qiell për të nxitur kondensimin dhe formimin e reve, shkruan Metro.co.uk.

Vendi e ka përdorur këtë teknologji në të kaluarën për të siguruar ngjarje të mëdha, të tilla si Lojërat Olimpike 2008 në Pekin që ndodhën nën një mot të mirë. Sipas një deklarate nga Këshilli i Shtetit, Kina do të rrisë në mënyrë agresive modifikimin e motit për të mbuluar një sipërfaqe prej rreth 4 milion kilometrash katror deri në vitin 2025, transmeton Telegrafi. Kjo është një zonë më e madhe se i gjithë vendi i Indisë.

“Zona e përgjithshme e operacionit të reshjeve artificiale (reshjeve të borës) do të arrijë përtej 5.5 milion kilometra katrorë dhe për shtypjen e breshërit duhet të shkojë përtej 580,000 kilometra katrorë”, thuhet në deklaratë.

Deri në vitin 2035, modifikimi i motit i Kinës duhet të arrijë në një nivel të përparuar në të gjithë botën për sa i përket funksionimit, teknologjive dhe shërbimeve. Rregullimi i motit në një shkallë kaq masive mund të ketë ndikime të thella në klimën globale dhe padyshim që do të shkaktojë fërkime me vendet e tjera.

Kina dhe India ndajnë një kufi të diskutueshëm që ka parë përplasje të dhunshme dhe ka shkaktuar probleme midis dy vendeve. Industria bujqësore indiane mbështetet në muson dhe çdo përpjekje nga kinezët për të kontrolluar ose ndikuar në mot mund të shkaktojë konflikt midis fqinjëve. /Telegrafi/