Ekonomi Financa

Tahiri tregon dhjetë efektet e Ligjit për Rimëkëmbje

Foto: Arkiv

Para 4 vitesh

Zëvendëskryeministri nga radhët e AAK-së, Besnik Tahiri ka treguar dhjetë efektet e Ligjit për Rimëkëmbjen Ekonomike, pas miratimit të këtij të fundit në seancën e sotme të Kuvendit.

Tahiri përmes një postimi në Facebook, ka shkruar se mandati i pozitës dhe opozitës në demokraci, është para së gjithash mbrojtja dhe përfaqësimi i qytetarëve.

“Është inkurajuese dhe për tu përshëndetur, që ndodhi një reflektim pozitiv, edhe pse i vonuar në lidhje votimin e Ligjit për Rimëkëmbje. Është premtues fakti që shumica e nevojshme, gjykoi drejtë, që me mos kalimin e Ligjit, ishin qytetari dhe shteti të cilëve po u bëhej padrejtësi”, ka shkruar Tahiri.

Postimi i plotë:

10 efektet e Ligjit për Rimëkëmbje Ekonomike!
Mandati i pozitës dhe opozitës në demokraci, është para së gjithash mbrojtja dhe përfaqësimi i qytetarëve. Secili përfaqësues, secili institucion, secili subjekt, secili që ka mandat të flasë apo përfaqësojë sovranin, në momente të caktuara, kritike, duhet të ketë fuqinë të ngritet mbi pozicionet, interesat, apo pikëpamjet parciale.
Është inkurajuese dhe për tu përshëndetur, që ndodhi një reflektim pozitiv, edhe pse i vonuar në lidhje votimin e Ligjit për Rimkëmbje. Është premtues fakti që shumica e nevojshme, gjykoi drejtë, që me mos kalimin e Ligjit, ishin qytetari dhe shteti të cilëve po u bëhej padrejtësi.
Më poshtë po ndaj me ju dhjetë (10) efektet e Ligjit për Rimëkëmbje Ekonomike, i cili do të ketë një impakt rifreskues për zhvillimin, ekonominë dhe mirëqenien.
Mes tjerash, Ligji për Rimëkëmbje do të:
1. Ulë presionin mbi ekonominë, bizneset dhe familjet;
2. Për një periudhë të kufizuar, do të rrisë fuqinë blerëse, konsumin dhe shërbimet;
3. Do të ekuilibroj sadopak zhvillimet në tregun vendor financiar;
4. Do të rifreskoj potencialin e bizneseve të vogla, tashmë të rrezikuara, për të operuar më gjatë dhe më qëndrueshëm në treg;
5. Do të zbusë efektet negative të pandemisë, veçmas te ato familje me të ardhura më të ulta;
6. Do të ndikoj pozitivisht te të gjithë, në fuqinë e shtetit si faktor stabilizues ekonomik;
7. Do të shërbejë si instrument i ‘tërthortë’ i asistencës sociale, për shtresat në vështirësi;
8. Përçon mesazh të fortë te komuniteti ndërkombëtar për klimen e përgjithshme ekonomike në Kosovë;
9. Ofron mundësi të re, që në dritë të këtij ligji, të planifkohen hapat tjerët të shpenzimeve në planet vjetore dhe afatmesme financiare;
10. Rehabiliton besimin e dëmtuar te qytetarët kundrejt kapacitetit vendimmarrës institucional, rezultat i vonesave vendimmarrëse.
Lidershipi dhe përkushtimi kërkohet në kohëra sfidash, andaj duhet falenderuar secilin për guximin për të lëvizur përpara.
Nuk duhet humbur kohë,
Të fokusohemi në implementim efikas dhe të përpiktë! /Telegrafi/