BIK dënon sulmin në Vjenë: Terrori nuk ka fe, sulmi i mbrëmshëm ishte atak mbi vlerat njerëzore

Kryesia e Bashkësisë Islame të Kosovës, ka reaguar pas sulmit terrorist që ndodhi të hënën mbrëma në Vjenë të Austrisë.

Përmes një komunikate për media, sulmin e mbrëmshëm në Vjenë, BIK e ka cilësuar si atak mbi vlerat njerëzore, humane e hyjnore.

“Vepër e dënueshme dhe e papranueshme që për qëllim ka frikën, shantazhin e kaosin, si dhe sfidimin e rendit dhe ligjit.Nuk duhet bërë asnjë kompromis me terrorin, sepse terroristët nuk përfaqësojnë asnjë vlerë e asnjë besim përveç krimit e terrorit. Terrori nuk ka fe, por ka ideologji që ne nuk duhet pranuar e heshtur para tij”, thuhet në komunikatë.

Komunikata e plotë:

“Kush vret një njeri është sikur të ketë vrarë mbarë njerëzimin” . Kurani
Sulmi i mbrëmë në Vjenë të Austrisë, është atak mbi vlerat njerëzore, humane e hyjnore. Vepër e dënueshme dhe e papranueshme që për qëllim ka frikën, shantazhin e kaosin, si dhe sfidimin e rendit dhe ligjit .
Nuk duhet bërë asnjë kompromis me terrorin, sepse terroristët nuk përfaqësojnë asnjë vlerë e asnjë besim përveç krimit e terrorit. Terrori nuk ka fe, por ka ideologji që ne nuk duhet pranuar e heshtur para tij.
Në këto momente, jemi pranë popullit e shtetit mik të Austrisë, bashkëndiejmë dhimbjen me familjet e viktimave, ndërsa të plagosurve u dëshirojmë shërim të shpejtë.
“Mysliman është ai njeri, nga dora dhe gjuha e të cilit njerëzit janë të sigurt”. Muhamedi a.s./Telegrafi/