Këto janë masat e reja restriktive që do t’i propozohen Qeverisë së Maqedonisë së Veriut

Ministri i Shëndetësisë, Venko Filipçe sot pas mbledhjes me Komisionin për Sëmundje Infektive (KSI) tha se janë marrë disa vendime që do të parandalojnë përhapjen e virusit, përcjell Telegrafi Maqedoni.

“Mbajtëm mbledhje së bashku me Komisionin për Sëmundje Infektive (KSI) për gjendjen aktuale me pandeminë. Situata nëpër spitale mund të them se është e qetë dhe jemi të gatshëm për ndonjë sfidë të re dhe më të madhe. Numri i të infektuarve rritet edhe në rajon. Një paketë masash është tashmë në Kuvend. Sot diskutuam për reduktimin e udhëtarëve në transportin publik deri në 50% dhe ndalimin e punës për të gjithë operatorët ekonomik nga ora 23:00” tha ministri Filipçe.

Filipçe tha se këto masa do të parashtrohen në Qeveria pasi mendohet se këto masa do të pengojnë përhapjen e virusit. Karaxhovski tha KSI nuk mendon që të vendoset orë policore për momentin. “Nëse nuk e ndihmojmë veten, as ora policore e as masat nuk ndihmojnë” tha Zharko Karaxhovski. Paketa e prezantuar sot do t’i parashtrohen qeverisë në ditën e hënë (19.10.2020). /Telegrafi/