PDK në Prizren: LVV nuk ka kapacitete menaxhuese, komuna nuk fitoi as minimumin e pikëve për Grantin e Performancës

Partia Demokratike në Prizren përmes një komunikate për medie ka thënë se Lëvizja Vetëvendosje nuk ka aftësi menaxhuese dhe se Komuna e Prizrenit nuk ka arritur as minimumin e pikëve për të konkuruar për Grantin e Performancës Komunale, ku u ndanë 4.9 milionë euro shpërblim për komunat me performancën më të mirë.

Sipas njoftimit, në vlerësimin e performancës nga ministria, Prizreni është vendosur në vendin e 23-të.

“Sikur që po vërehet, Komuna e Prizrenit nuk e ka arritur as minimumin e pikëve, për të konkuruar e lëre më për të fituar. Po ashtu një vlerësim tjetër i performancës së Komunave nga Ministria respektive, bazuar në kriteret relevante të matjes së performancës, e ka vendosur Komunën e Prizrenit në vendin e 23-të, që është nën mesataren, si dhe në vendin e 24-të Prishtinën. Sipas një klasifikimi tjetër, Komuna e Prizrenit është ranguar në vendin e 10-të në nivel vendi, sa i përket performancës për shërbimet administrative”, thuhet ndër të tjera në njoftimin e PDK-së në Prizren.

PDK-ja në Prizren njofton se para Komunës së Prizrenit, kanë dalur disa komuna më të vogla si: Rahoveci që është radhitur i pari, pastaj Suhareka, Vitia, Istogu, Lipjani etj.

“Specifikisht po i përmendim këto 2 komuna: Prizrenin dhe Prishtinën, sepse Prishtina ka qenë e udhëhequr nga VV dhe po dëshmohet se përveç mungesës së kapaciteteve menaxhuese dhe resurseve humane, problem mund të kenë edhe ideologjinë dhe mungesën e një koncepti të avancuar qeverisës”, thuhet në komunikatë.

Qyteti i Prizrenit, sipas PDK-së atje, në vazhdimësi po ballafaqohet me pasoja të kësaj filozofie dhe mënyre të qeverisjes, ku sipas tyre asgjë nuk respektohet, përfshirë këtu edhe partnerët e koalicionit që e sollën në pushtet kryetarin aktual.

“Rangimet e Komunave bazuar në matje të performancës sipas kritereve, janë argumente që e mbështesin këtë pohim e që Komuna e Prizrenit ka dalur shumë keq”, thuhet në njoftim. /Telegrafi/