Mbi 39 për qind e boshnjakëve nuk do të pranonin të vaksinohen kundër coronavirusit

Megjithëse situata në lidhje me pandeminë COVID-19 në Bosnje-Hercegovinë po përkeqësohet dita-ditës, duket se banorët e këtij shteti nuk janë ende të gatshëm të vaksinohen, pasi vaksina të jetë në dispozicion.

Përveç sfidës së gjeturi të një vaksine efektive, ekziston edhe sfida e pranimit publik të vaksinës, por edhe pyetja me të cilën përballen institucionet qeverisëse – nëse vaksinimi do të jetë i detyrueshëm për të gjithë qytetarët, shkruan klix.ba.

Kompania boshnjake e specializuar për sondazhe, Valicon ka monitoruar ndikimin e pandemisë COVID-19 te qytetarët e Bosnje dhe Hercegovinës në baza javore që nga muaji mars.

Sipas një sondazhi del që mbi 39 për qind e qytetarëve nuk planifikojnë të vaksinohen. Po ashtu, qytetarët besojnë se vaksina nuk duhet të jetë e detyrueshme për të gjithë, transmeton Telegrafi.

Rreth 32 për qind e qytetarëve do të pranonin të vaksinohen ndërsa pjesa tjetër e popullsisë është e pavendosur dhe nuk ka pozitë të qartë kur bëhet fjalë për qëllimin e vaksinimit të mundshëm kundër COVID-19.

Rezultatet aktuale tregojnë se popullsia e Bosnjës dhe Hercegovinës nuk është plotësisht e sigurt nëse do të vaksinohej kundër COVID-19.

Ndryshe, Bosnja-Hercegovina ka regjistrua 13138 raste me coronavirus gjersa kanë ndërruar jetë 379 persona. /Telegrafi/