Shqipëri: Ndryshimi i Kushtetutës, Ambasada Amerikane: Keqardhje për mungesën e konsensusit

Ambasada Amerikane në Tiranë në një reagim pas votimit në Parlament për ndryshimin e Kushtetutës që kanë të bëjnë me reformën zgjedhore, thotë se, kjo duhej të arrihej me konsensus siç u arrit marrëveshja e 5 qershorit.

“Më 23 korrik, Parlamenti miratoi legjislacionin për të kodifikuar marrëveshjen e 5 qershorit për reformën zgjedhore, e cila u arrit në një mënyrë transparente dhe gjithëpërfshirëse përmes Këshillit Politik. Sot, Parlamenti miratoi ndryshime në Kushtetutë që do të mundësojnë masa shtesë për reformën zgjedhore. Ndërsa ky veprim ishte në kompetencën e Parlamentit, është për të ardhur keq që nuk u mor në të njëjtin frymë me të cilën u arrit marrëveshja e 5 qershorit”, thuhet në deklaratë.

Më tej, përfaqësuesit diplomatikë të SHBA në Tiranë i kanë bërë thirrje mazhorancës që të gjejë gjuhën e përbashkët me opozitën për zbatimin e këtyre ndryshimeve sa i takon listave të hapura dhe koalicionet zgjedhore.

“Ne i kujtojmë shumicës deklaratat e saj se, megjithë miratimin e sotëm në Parlament, ata synojnë të angazhohen me të gjithë partitë në Këshillin Politik, në mirëbesim dhe me qëllimin për të arritur në marrëveshje për zbatimin e legjislacionit mbi listat e hapura dhe koalicionet. Ne e kuptojmë zhgënjimin e Opozitës së Bashkuar, ndërsa mirëpresim vendosmërinë e tyre për të mbetur të angazhuar në institucione dhe procese demokratike, përfshirë Këshillin Politik, në mënyrë që të dëgjohen zërat e të gjithë shqiptarëve. Përsërisim, se ne do të shohim nëse drejtuesit do ta mbajnë fjalën e tyre. Ashtu siç vepruan në arritjen e marrëveshjes së 5 qershorit, udhëheqësit shqiptarë duhet të tregojnë gatishmërinë dhe aftësinë e tyre për të negociuar marrëveshje që vënë në radhë të parë interesat më të mira të popullit shqiptar”, përfundon deklarata.