Ibraj: Spitali i Pejës i gatshëm për trajtimin e pacientëve me COVID-19

Instituti i Shëndetësisë Publike ka nxjerrë një rregullore të re ku pacientët që kanë simptoma të lehta të trajtohen në spitalet regjionale në mënyrë që të mos mbingarkohet Klinika Infektive e QKUK.

Shef i emergjencës në Spitalin e Përgjithshëm të Pejës, Besnik Ibraj ka thënë se ky spital është i gatshëm të trajtojë pacientë me COVID-19.

“Rekomandimi më i ri është që secili spital të ketë së paku dy dhoma ku do të trajtohen pacientët e mundshëm me COVID-19 në mënyrë që të bëhet shpërndarja e pacientëve dhe të mos mbingarkohet Klinika Infektive”, tha ai, përcjell Telegrafi.

“Edhe ne në Pejë kemi repart infektiv, kemi edhe mjekë infektolog që janë të gatshëm të përballen me këtë pandemi”.

Ibraj thotë se nëse qytetarët zbatojnë rekomandimet e institucioneve shëndetësore numri i të prekurve do të bjer vazhdimisht.

Shef i emergjencës në Spitalin e Përgjithshëm të Pejës doke folur për situatën e përgjithshme të shëndetësisë në Pejë thotë se spitali është duke punuar me kapacitet të plota por ai ka lutur pacientët që nuk kanë raste urgjente të drejtohen edhe të qendrat e mjekësisë familjare./Telegrafi/