Përleshje masive në veri të Mitrovicës, lëndohet edhe një polic

Një rrahje masive mes dy bandave ‘KM-Firm’ nga veriu i Mitrovicës dhe ‘Delije’ nga Zveçani, ka ndodhur të premten pas mesnatës në rrugën “Mbreti Petar” në veri të Mitrovicës, ku janë përdorur armë të ftohta, mjete të forta dhe gurë, ndërsa shumë prej pjesëmarrësve janë lënduar, disa prej të cilëve kanë kërkuar trajtim në spital. Gjatë intervenimit një pjesëtar i Policisë së Kosovës ka marrë lëndime të lehta trupore

Në vendin e ngjarjes janë parë numër i madh i policëve, duke përfshirë edhe pjesëtarë të NJRSH-së, si dhe autoambulanca nga spitali i veriut të Mitrovicës.

Burime të KosovaPress-it, bëjnë të ditur se sherri ka nisur fillimisht rreth orës 01:00 pas mesnatës në restorantin ‘Knez’, tek shëtitorja, pronar i së cilës është Radosha Petroviq, ndërsa ndjekja dhe rrahja e grupeve të të rinjëve ka vazhduar edhe në lokacione të ndryshme në veri të Mitrovicës.

Sipas këtyre burimeve, autorët e këtij incidenti janë vëllezërit Danijell dhe Marko Gjukiq nga Zveçani, të njohur si narko-bosë në veri.

“Incidentin e kanë shkaktuar vëllezërit Gjukiq. Udhëheqin drogën në veri, ndërsa kanë vuajtur burg vitin e kaluar në Kralevë, pikërisht për shkak të punëve të tyre të pista. Markon policia ka arritur ta arrestojë mbrëmë pas incidentit, ndërsa Daki është në arrati”, kanë thënë burime të KosovaPress-it.

Burimet më tej kanë shtuar se falë njësiteve policore të stacionineve veri i Mitrovicës dhe atij Zveçan, të cilët janë vënë shumë shpejtë në kryerje të detyrës për të parandaluar eskalimin e situatës, është evituar ndonjë viktimë.

Dyshohet se motivi i mundshëm i kësaj rrahje është konflikti i interesit mes grupeve.

Zëdhënësi i policisë për rajonin e veriut, Branisllav Radoviq, ka konfirmuar ngjarjen për KosovaPress.

“Nuk kemi informacione për grupe. Rrahja ka qenë masive, ndërsa policia ka reaguar menjëherë. Një polic ka marrë lëndime të lehta trupore. Personi me inicialet M.Gj. është arrestuar dhe i është caktuar paraburgimi për 48 orë. Hetimet vazhdojnë”, ka thënë shkurt për KosovaPress togeri Radoviq.  /Telegrafi/