Venko Filipçe: Nuk mendojmë për shkurtimin e orës policore

Ministri i Shëndetësisë Venko Filipçe, sot në konferencë për shtyp bëri të ditur se për momentin nuk mendojnë për shkurtimin e orës policore.

Sipas tij, pikërisht ora policore ka qenë një ndër faktorët që ka ndikuar në uljen e numrit të të infektuarve me coronavirus, përcjell Telegrafi Maqedoni.

“Tani për tani jo, sepse ora policore ishte një ndër faktorët që ndihmoi në uljen e numrit të të infektuarve. Në këtë moment, deri tani nuk kemi menduar për shkurtimin e orës policore. Po e përcjellim situatën, në rast se ka nevojë do të shqyrtojmë këtë çështje por deri në këtë moment jo”, tha Filipçe.

Ministri gjithashtu tha se edhe më tej do të mbetet në fuqi karantina shtetërore prej 14 ditëve, për personat që kthehen nga vendet e huaja.

Ai shtoi se i kanë propozuar Qeverisë lehtësimin e masave në tre faza. Fillimisht të hapen qendrat për edukim, autoshkollat, terrenet sportive për sporte individuale, bastoret (vetën nëpërmjet sporteleve) dhe qendrat tregtare pa shërbime hotelerike.

“Në fazën e dytë është paraparë hapja e kafeneve dhe restoranteve dhe stërvitjet sportive të ekipeve por vetëm në hapësira të hapura. Në fazën e tretë, planifikohet të hapen kazinotë, fitneset, hapja e sallave të mbyllura, pishinat dhe hotelet”, tha Filipçe.

Për këto propozime, sot do të vendos Qeveria e Maqedonisë së Veriut në seancë, e cila është paraparë të mbahet sot pasdite./Telegrafi/