Trump thotë se ka prova se coronavirusi ka filluar në laboratorin kinez

Presidenti amerikan Donald Trump ishte në kontradiktë me të dhënat nga komuniteti inteligjencës duke pohuar të enjten se ai ka parë prova që i japin atij një “shkallë të lartë besimi” se coronavirusi e ka origjinën në një laborator në Wuhan, Kinë, por nuk pranoi të jep detaje për të mbështetur pohimin e tij.

Komentet vijnë pas një deklarate publike nga Zyra e Drejtorit të Inteligjencës Kombëtare, lëshuar vetëm disa orë më parë, e cila deklaroi se nuk është bërë një vlerësim i tillë dhe vazhdon të “ekzaminojë me rigorozitet” nëse shpërthimi “filloi përmes kontaktit me kafshët e infektuara ose nëse ishte rezultati të një aksidenti në një laborator në Wuhan”.

“Po, unë kam”, citohet të ketë thënë Trump kur u pyet nëse ai kishte prova që sugjeronin që virusi të kishte origjinën në laborator, shkruan CNN, përcjell Telegrafi.

Më vonë, i pyetur pse ishte i sigurt në atë vlerësim, Trump ka thënë: “Unë nuk mund t’ju them këtë. Nuk më lejohet t’ju them”.

Zyrtarët e Trump kanë qenë duke e shtyrë komunitetin e inteligjencës amerikane që të përcaktojë origjinën e saktë të shpërthimit të coronavirusit në ndjekje të një teorie të paprovuar që pandemia filloi për shkak të një aksidenti laboratorik në Kinë, thanë shumë burime për CNN.

Në pranim të asaj përpjekjeje, Zyra e Drejtorit të Inteligjencës Kombëtare lëshoi një deklaratë publike të pashembullt të enjten para komenteve të Trump duke sqaruar se komuniteti i inteligjencës aktualisht po eksploron dy mundësi, por ende nuk mund të vlerësojë nëse shpërthimi “ishte rezultat i një aksidenti në një laborator në Wuhan ‘ose filloi’ përmes kontaktit me kafshët e infektuara”.

Sipas CNN, është e pazakontë që komuniteti i inteligjencës të komentojë publikisht mbi punën e tij përpara se të bëhet një vlerësim zyrtar.

Deklarata e së enjtes duket se ka ardhur si përgjigje e pyetjeve në rritje mbi origjinën e virusit pasi zyrtarët e administratës Trump kanë kaluar javë me radhë duke përsëritur teorinë se virusi kishte origjinën brenda një laboratori kinez.

Trump tha të enjten se kishte “shumë teori” që ai do t’i vlerësonte, por dukej se shpresonte se Pekini përfundimisht do të vinte me atë që di për origjinën e virusit.

“Kina mund të na tregojë”, citohet të ketë thënë më tej presidenti amerikan. /Telegrafi/