Kryetari i Pragës nën mbrojtjen e policisë – raportohet se është në shënjestër të një komploti rus

Kryetari i Pragës së Çekisë, Zdenek Hrib, ka thënë se është nën mbrojtjen e policisë pasi është në “rrezik për jetë” – pasi një hetim çek raportoi se ai ishte në shënjestër të një komploti helmimi rus.

Sipas mediave të huaja, përcjell Telegrafi, Hrib konfirmoi të hënën se policia e kishte vendosur atë nën mbrojtje disa javë më parë, pasi e kishte identifikuar kërcënimin kundër tij, mirëpo, refuzoi të tregonte nëse ishte në shënjestër të Rusisë apo edhe të zbulonte natyrën e këtij kërcënimi.

“Duhet të them se është e rëndësishme për mua t’i qëndrojë mbrapa bindjes sime, edhe në qoftë se jam i rrezikuar për jetë”, tha Hrib në një intervistë në stacionin e pavarur të Rusisë Echo të Moskës.

“Mbrojtja më është siguruar thjesht nga policia çeke. Me vendimin e tyre, unë nuk kam të drejtë të komentoj arsyet”, është shprehur ai.

Hrib shtoi se ai kishte qenë nën mbrojtjen e policisë për më shumë se dy javë.

Javën e kaluar, mediet çeke raportuan se ai ishte vendosur “nën mbrojtje të përkohshme të policisë”, pasi ngriti ankesë si pasojë e shqetësimeve që po ndiqej pranë shtëpisë së tij.

Të dielën, revista e përjavshme çeke “Respekt”, raportoi se një person që mbante dokumente diplomatike ruse kishte mbërritur në Pragë tre javë më parë, me qëllim të vrasjes së Hrib dhe një politikani tjetër çek, Ondrej Kolar.

Uebfaqja e lajmeve, duke cituar burime anonime të inteligjencës çeke, tha se atentatori i mundshëm kishte transportuar një valixhe që përmbante sasinë e helmit vdekjeprurës.

Politikanë çekë nuk e kanë konfirmuar atë raport, po ashtu edhe Dmitry Peskov një zëdhënës i Presidentit rus Vladimir Putin e quajti atë të rremë.

“Ne nuk dimë asgjë në lidhje me këtë hetim”, tha ai të hënën.

“Ne nuk e dimë kush e bëri hetimin”, shtoi Peskov. /Telegrafi/