Ministri Vitia dhe ambasadori Braathu bisedojnë për situatën me pandeminë COVID-19

Ministri i Shëndetësisë, Arben Vitia, priti sot në takim ambasadorin e OSBE-së në Kosovë, Jan Braathu, me të cilin diskutuan për situatën me pandeminë COVID-19.

Sipas njoftimit për media të MSH-së, ambasadori Braathu tha se masat e ndërmarra me qëllim të parandalimit të sëmundjes COVID-19 kanë ndikuar që të ketë një situatë më të mirë në Kosovë.

Sipas Braathu në këto rrethana asgjë nuk është më e rëndësishme sesa shëndeti publik, veçanërisht kur janë sfiduar edhe sistemet më të zhvilluara të shëndetësisë në botë.

Ndërkaq, ministri Vitia tha se masat janë një prej arsyeve që sot shtrirja e epidemisë është më e sheshtë si dhe theksoi rëndësinë e unitetit për t’u ballafaquar me këtë situatë.

Ai po ashtu e njoftoi ambasadorin Braathu për së afërmi edhe me mekanizmat e parapara për menaxhimin e situatës pandemike

Ministri Vitia, gjithashtu, e njoftoi se gjatë kësaj kohe janë siguruar ndihmë nga OBSH, UNICEF, Bashkimi Evropian, SHBA-ja, AQH – SDC (Swiss Development and Cooperation Agency).

Në këtë takim u diskutua për humanitetin që duhet ta tregojnë të gjithë për të bashkëvepruar për të ndaluar shtrirjen e mëtutjeshme të COVID-19.

Gjithashtu, u diskutua për domosdoshmërinë e bashkëpunimit me komunat ku jetojnë edhe komunitetet e tjera.

Ministri Vitia e siguroi ambasadorin se Ministria e Shëndetësisë nuk do të bëjë asnjë dallim me asnjë nga komunat dhe komunitetet që jetojnë në Kosovë.

Ai tha se në situatën në të cilën gjendemi është shumë i rëndësishëm koordinimi dhe bashkëpunimi që sa me më pak pasoja të tejkalohet kjo situatë e vështirë nga që, sipas tij, virusi nuk njeh as nacionalitet e as kufi. /Telegrafi/