Kurti e njofton ministren britanike Morton për planin e heqjes graduale të taksës dhe zëvendësimin me reciprocitet  

Kryeministri i Republikës së Kosovës, Albin Kurti, priti sot në takim ministren për Evropë dhe Amerikë të Qeverisë së Mbretërisë së Bashkuar, Wendy Morton, të cilën e njoftoi për planin e heqjes graduale të tarifës dhe zëvendësimit të saj me masa reciprociteti.

Kurti po ashtu e njoftoi edhe për hapjen e mundësisë për heqjen e barrierave jotarifore në mes të dy vendeve, hap ky në drejtim të rifillimit të dialogut politik.

Në njoftimin për media thuhet se ministrja Morton u interesua për situatën në Kosovë, si dhe për mbarëvajtjen e punëve në projektet e Qeverisë Kurti, të cilat ishin përmendur në takimin e përbashkët  muajin e kaluar në Londër.

Me këtë rast kryeministri Kurti e njoftoi ministren me hapat e parë të qeverisë, siç janë fillimi i procesit të vetingut, shkarkimi i bordeve të ndërmarrjeve publike me performancë të dobët, hartimi dhe miratimi i projektbuxhetit për këtë vit, si dhe anulimi i disa kontratave të dëmshme ekonomike për vendin tonë.

“Në takim u diskutua edhe dialogu me Serbinë, dhe çështja e tarifës ndaj mallrave të Serbisë, me ç’rast kryeministri e njoftoi ministren Morton për planin e heqjes graduale të tarifës dhe zëvendësimit të saj me masa reciprociteti, si dhe hapja e mundësisë për heqjen e barrierave jotarifore në mes të dy vendeve, hap ky në drejtim të rifillimit të dialogut politik. Të dy palët u pajtuan se dialogu i hapur dhe konstruktiv është shumë i rëndësishëm për stabilitetin në rajon”, thuhet në njoftim. /Telegrafi/