Bajrami uron 7 Marsin dhe zotohet se Qeveria do t’i mbështet mësuesit

Ministrja e Arsimit, Shkencës, Teknologjisë dhe Inovacionit, Hykmete Bajrami me rastin e Ditës së Mësuesit, ka uruar të gjithë mësuesit dhe punonjësit e arsimit në Republikën e Kosovës si dhe në tërë hapësirën shqiptare.

Ajo ka thënë se duhet të reflektojmë, që mësuesit t’i çmojmë, e t’u krijojmë kushte, sepse duhet të përgatisim brezat për kohët e reja dhe sfidat e reja, ku dija, shkathtësitë dhe arsimimi cilësor janë çelësi për prosperitet dhe zhvillim të gjithëmbarshëm.

Bajrami u zotua se për të përmbushur këtë vizion, Qeveria e Republikës së Kosovës do t’i mbështet mësuesit, nxënësit, shkollën dhe arsimin në përgjithësi.

“Në këtë mes, ne nuk do t’i harrojmë, përkundrazi, do t’i mbështesim njëkohësisht edhe të gjithë mësuesit në diasporë, bashkë me nxënësit e prindërit që mbajnë gjallë me dashuri e pasion mësimin e gjuhës dhe kultivimin e kulturës sonë kombëtare”, ka shkruar Bajrami në Facebook.

Këtë urim, Bajrami e bëri në emër të MASHTI-t dhe të sajin personal, për të gjithë punonjësit e arsimit.

Postimi i plotë:

Në emër të Ministrisë së Arsimit, Shkencës, Teknologjisë dhe Inovacionit si dhe në emrin tim personal shpreh urimet më të përzemërta për të gjithë mësuesit dhe punonjësit e arsimit në Republikën e Kosovës si dhe në tërë hapësirën shqiptare.

Kjo ditë e rëndësishme është një momentum për të kujtuar breza të pafund mësuesish të cilët dhanë gjithçka nga vetja e tyre për edukimin e gjeneratave të tëra bashkëkombasish. Mësuesit tanë ndriçuan të ardhmen e qindra mijëra të rinjëve e të rejave. Ata arritën të brumosin thellë idealet liridashëse e atdhetare tek një shoqëri e tërë. Falë tyre, këto virtyte u vunë në shërbim të përpjekjeve për emancipim, për liri, pavarësi dhe shtetndërtim, për të mirën tanë e të brezave që do të vijnë pas nesh.

Ashtu sikurse mësuesit Rilindas, që nga Pandeli Sotiri, Petro Nini Luarasi e shumë e shumë të tjerë, ed he në Kosovën e okupuar, mësuesit tanë ishin misionarë të shpresës e humanizmit duke dhënë më të mirën e tyre për të mbajtur gjallë dëshirën për dije dhe gatishmërinë për sakrificë. Pikërisht për faktin se dija e përçmon robërinë e nuk duron nënshtrimin. Ajo këput prangat e tiranisë ashtu siç bëri në të vërtetë.

Sot duhet të reflektojmë, që mësuesit t’i çmojmë, e t’u krijojmë kushte, sepse duhet të përgatisim brezat për kohët e reja dhe sfidat e reja, ku dija, shkathtësitë dhe arsimimi cilësor janë çelësi për prosperitet dhe zhvillim të gjithëmbarshëm.

Për të përmbushur këtë vizion, ne si Qeveri e Republikës së Kosovës do t’i mbështesim mësuesit, nxënësit, shkollën dhe arsimin në përgjithësi. Në këtë mes, ne nuk do t’i harrojmë, përkundrazi, do t’i mbështesim njëkohësisht edhe të gjithë mësuesit në diasporë, bashkë me nxënësit e prindërit që mbajnë gjallë me dashuri e pasion mësimin e gjuhës dhe kultivimin e kulturës sonë kombëtare.