Amerika tentoi ta vrasë edhe një tjetër zyrtar të lartë ushtarak po atë natë kur vranë Solemanin

Në të njëjtën ditë që ushtria amerikane vrau gjeneralin iranian Qassem Soleimani në Bagdad, forcat amerikane kryen një tjetër mision sekret të lartë kundër një zyrtari të lartë ushtarak iranian në Jemen, sipas një raporti të ri.

Caku ishte Abdul Reza Shahlai, një financier dhe komandant kryesor i Iranit dhe Focave Quds, i cili ka qenë aktiv në Jemen, por që nuk rezultoi në vdekjen e tij, thanë katër zyrtarët amerikanë të njohur me këtë çështje për Washington Post, transmeton Telegrafi.

Sulmi i suksesshëm i 3 janarit që vrau Soleimanin ndezi zemërim nga regjimi iranian, i cili u hakmarr me sulme me raketa balistike në dy baza irakiane që strehojnë trupat amerikane, por nuk shkaktuan viktima.

Zyrtarët thonë se Pentagoni do të kishte njoftuar të dy sulmet së bashku nëse do të kishin qenë të suksesshëm, por nuk e zbuluan misionin sepse nuk shkoi sipas planit.

Është e paqartë pse operacioni për të vrarë Shahlai ishte i pasuksesshëm. Departamenti i Mbrojtjes nuk iu përgjigj menjëherë një kërkese për koment nga DailyMail.com.

Shahlai, i lindur rreth vitit 1957, ka qenë i lidhur me sulme kundër forcave amerikane në Irak, përfshirë një sulm të sofistikuar të vitit 2007, në të cilën militantët e mbështetur nga Irani rrëmbyen dhe vranë pesë trupa amerikanë në qytetin e Karbala.

Muajin e kaluar, Departamenti i Shtetit ofroi një shpërblim prej 15 milionë dollarësh për informacionin në lidhje me Shahlai.

Njoftimi thoshte se Shahlai është i vendosur në Jemen dhe ka një ‘histori të gjatë përfshirjeje në sulme që synojnë SHBA-të dhe aleatët e saj, përfshirë në komplotin e 2011 kundër ambasadorit saudit’ në një restorant italian në Uashington.

Baza e operacionit të Shahlai është në Sana’a, Jemen, ku ai shërben si financier kryesor i Forcave Quds që mbështesin forcat prokame shiite të Iranit në rajon. /Telegrafi/