Tetovë, asgjë nga premtimi për transportin publik

Përkundër premtimeve të njëpasnjëshme të autoriteteve lokale për autobusët, Tetova edhe më tej mbetet pa transport publik. Banorët shprehen të zhgënjyer nga vonesat disavjeçare për zgjidhjen e kaosit në trafik.

“Ja siç e shihni në vend të autobusëve ne bëjmë transport. Shumë kanë premtuar por nuk kanë realizuar asgjë dhe si duket gjatë do jetë pa transport publik. Disa projekte që i kanë filluar i kanë lënë në gjysmë dhe s`mendoj se do i realizojnë deri në fund”

“Kur, sivjet do i bjere në mot apo tjetër vit! Asnjëherë s`do bëhet, s`është bë gjë ndonjëherë. Vetëm premtime ka”

Komuna e Tetovës edhe në këtë rast shfajësohet duke hedhur topin tek Ministria e Financave. Kreu i Këshillit Komunal thotë se presin pëlqimin për blerjen e autobusëve në vlerë prej 73 milion denarëve.

“Dua të them se ajo ka kaluar më në mbledhjen e bordit të Bankës Botërore, dhe si kërkesë për huamarrje deri tek ministria e Financave ka kaluar, dhe presim tani që ajo të aprovohet”, deklaroi Bekim Memeti, Kryetar i këshillit komunal Tetovë.

Nga ana tjetër, nga Ministria e Financave thonë se kanë përfunduar të gjitha procedurat, dhe se pritet vetëm dërgimi i dokumentacionit në Bankën Botërore.

“Kërkesa e komunës së Tetovës për furnizim me pesë autobusë, është miratuar nga Banka Botërore, po ashtu edhe nga Ministria e Financave. Pritet tani përfundimi i projekt dokumentacionit final të cilat më pas do të dërgohen në Bankën Botërore për blerjen e autobusëve”, thonë nga Ministria e Financave.

Përveç mos furnizimit të autobusëve, nga drejtoria për transport e komunës së Tetovës, nuk kanë filluar ende as rregullimin e vendeve për pritje të autobusëve./Alsat/