Gostivar, interesim i madh për vaksina kundër gripit

Mbi 1.000 vaksina falas për gripin sezonal që u siguruan për kategoritë e rrezikuara në Gostivar janë shpenzuar. Vaksinat falas mund t’i përdornin personat mbi 65 vjet, të sëmurët kronikë, fëmijë mbi gjashtë muaj deri në pesë vjet dhe gratë shtatzëna dhe punëtorët shëndetësor.

Nga Reparti epidemiologjik njoftojnë se ka ende vaksina komerciale, që kushtojnë 650 denarë dhe se qytetarët e interesuar mund të paraqiten tek ata për vaksinim, përcjell Telegrafi Maqedoni.

“Mbrojtja më e mirë kundër gripit është vaksina dhe për këtë shkak do të dëshiroja t’ju bëj thirre qytetarëve të vaksinohen. Gripi është rrezik për të sëmurët kronik, që kanë probleme me mushkëritë, zemrën, personat me diabet dhe personat tjerë me imunitet të dobët. Rekomandimi i Organizatës Botërore të Shëndetësisë është që të merret vaksina, për arsye se gripi mund të sjell komplikime serioze”, thotë Vojislav OGnjanovski, epidemiolog.

Numri i të sëmurëve nga gripi në Gostivar shënon rritje. Në javën e fundit të dhjetorit janë regjistruar 61 raste ndërsa numri i përgjithshëm i të sëmurëve nga gripi për këtë sezon është 1463, që e bën Gostivarin qytetin me më së shumti të sëmurë nga gripi.

Mjekët thonë se sipas përvojës nga vitet e kaluara, numri i të sëmurëve do të rritet në janar dhe shkurt./Telegrafi/