Qindra njerëz protestojnë në Serbi kundër ligjit të ri të kishave në Mal të Zi

Qindra protestues në Serbi u mblodhën para ambasadës malazeze të premten në mbrëmje, pasi Mali i Zi miratoi një ligj të diskutueshëm fetar më herët.

Kisha Ortodokse Serbe thotë se ligji mund t’i heqë kishës pronat e saj, përfshirë manastiret mesjetare dhe kishat. Ligjvënësit pro-serbë në parlamentin e Malit të Zi u arrestuan të premten, pasi ata u përpoqën të bllokonin votën, transmeton Telegrafi.

Në Serbi, presidenti Aleksandar Vuçiq tha se ishte i shqetësuar, por shpresonte se tensionet do të lehtësohen dhe vendet e shenjta të kishës do të ruhen.

Vuçiq premtoi se do të ndihmojë kishën serbe në Mal të Zi.

Lexo po ashtu Kaos në Parlamentin e Malit të Zi, “fluturuan” shishet dhe mikrofonat, pati fyerje e sharje – derisa intervenoi policia

Gjithashtu të premten, një përleshje e shkurtër shpërtheu në parlamentin serb kur ligjvënësit e opozitës nacionaliste mbajtën parulla që kritikonin ato që ata quanin mungesë përgjigjeje nga Serbia për ngjarjet në Mal të Zi.

Kisha Ortodokse Serbe në Mal të Zi e përshkroi ligjin si “diskriminues dhe antikushtetues”. Patriarku Irinej, kreu i kishës, tha që autoritetet malazeze “duhet të ndalen menjëherë me terrorin brutal kundër kishës”.

Popullsia e Malit të Zi prej rreth 620,000 banorësh është kryesisht e krishterë ortodoks dhe kisha kryesore është Kisha Ortodokse Serbe.

Një kishë ortodokse e veçantë malazeze nuk njihet nga kishat e tjera të krishtera ortodokse.

Gjukanoviç ka akuzuar Kishën Ortodokse Serbe për promovimin e politikave pro-serbe dhe përpjekjen për të minuar shtetësinë e vendit që kur u nda nga Serbia në 2006.

Malazezët mbeten të ndarë nëse shteti i vogël Adriatik duhet të mbështesë lidhje të ngushta me Serbinë.

Rreth 30% e popullsisë së Malit të Zi identifikohen si serbë dhe kryesisht ishin kundër ndarjes nga Serbia. /Telegrafi/