Filipçe: Pensionistët më nuk kanë frikë se do të ngelin pa ilaçe

Ministri i Shëndetësisë, Venko Filipçe sot pati një takim me Shoqatën e pensionistëve në Veles ku diskutuan për masat dhe aktivitetet që Ministria po zbaton për të përmirësuar sistemin shëndetësor në vend.

“Me anulimin e kuotave të recetave, pacientët kanë ilaçe të disponueshme në çdo kohë në fillim, në mes dhe në fund të muajit. Kemi takime të rregullta me pensionistët, sepse duam të dëgjojmë qëndrimin dhe mendimin e tyre, për të na thënë në cilat segmente duhet të përmirësohemi. Ne u takuam me pensionistët nga Gjevgjelia, Manastiri, Shkupi dhe Kumanova. Ata janë të kënaqur sepse nuk bëjnë më farmaci në shtëpi dhe nuk kanë frikë se do të ngelin pa ilaçet e nevojshme”, tha Filipçe.

Në mbledhje, Filipçe tha se, pensionistët e mirëpritën masën për të hequr kuotat dhe theksoi se ndiheshin të qetë sepse kishin ilaçe në çdo ditë të caktuar.

“Nuk ka më turma. Ne kemi ofruar shërbime shëndetësore cilësore dhe ilaçe sipas nevojave të qytetarëve”, thuhet në deklaratë./Telegrafi/