Eneda Tarifa për Fifin: Do doja që kjo kupë të ndahej dhe ta merrnim që të dyja

Mbrëmë (e shtunë), është mbajtur nata finale e festivalit “Kënga Magjike” në Pallatin e Kongreseve, në Tiranë.

Fituese e këtij kompeticioni muzikor u shpall artistja e mirënjohur Eneda Tarifa me këngën “Ma zgjat dorën”.

Në vend të dytë u rendit Filloreta Raçi – Fifi me këngën “Marova”, e cila ishte një prej projekteve më të votuara nga publiku.

Pasi mori në dorë çmimin, këngëtarja Tarifa ftoi afër vetes Fifin dhe është shprehur se dëshiron të ndajë fitoren me të.

Lexo po ashtu Kush është Eneda Tarifa? Njihuni me fituesen e festivalit Kënga Magjike

“Dëgjo këtu, unë votova me shumë dëshirë për ty, për këngën e mrekullueshme që na dhe, edhe për zërin e mrekullueshëm që ke, dhe për fjalët kaq të bukura. Realisht do doja shumë që kjo kupë të ndahej dhe ta merrnim që të dyja”.

“Dua një duartrokitje shumë të madhe për Fifin, e mrekullueshmja”, ka thënë mes të tjerash Eneda.

Këtë vit, “Kënga Magjike” u realizua për “Këndojmë për të ndërtuar”, ndërkohë që të ardhurat e mbledhura nga biletat do të shkojnë për të mbështetur të prekurit nga tërmeti i 26 Nëntorit në Shqipëri. /Telegrafi/