Këngëtarja Evi Reçi rrëfen dhimbjen: Humbi xhaxhanë, fëmijët e xhaxhait dhe shoqen e ngushtë nga tragjedia në Durrës

Katastrofa natyrore e ndodhur pak ditë më parë ka lënë të vdekur dhjetëra persona, qindra të plagosur e mijëra dëme materiale.

Fatkeqësia më e madhe është humbja e njerëzve, numri aktual i të cilëve ka shkuar në 46 sipas raportimeve të fundit.

Një ngjarje veçanërisht e tmerrshme duket të ketë qenë kjo për familjen Reçi, e cila ka pasur humbje të mëdha anëtarësh.

Këngëtarja e njohur shqiptare, njëherësh edhe prezantuesja televizive Evi Reçi, është ajo e cila për fatin e saj të keq nga tërmetet në Durrës ka humbur xhaxhanë, fëmijët e xhaxhait dhe shoqen e ngushtë.

Ajo në një postim të ndier të bërë në orët e vona të së enjtes ka rrëfyer për tragjedinë e trishtë, nga e cila ka mbetur zemërthyer dhe e pikëlluar.

“Te pranosh te papranueshmen. Me ndodhi dhe mua. I ndodh kujtdo. Sa e cuditshme! Ne momente te veshtira dhe te dhimbshme, te rikthehen ne mendje kujtimet me te bukura… Ashtu mu kujtua dhe Kristi im, qe kercenim dhe kendonim bashke, ashtu dhe Klausi qe qante qe se merrnim me vete se ishte i vogli e ne te “medhenjt”, ashtu dhe Axha Edi qe humori verior ishte ne cdo fjalen e tij, ashtu dhe Dolora qe dedikoi jeten per familjen e saj. Po ashtu me rikthehu kujtimet dhe Diena, shoqja ime e femijerise… dilnim, benim thashetheme, ndanim sekretet. Sic ishte ne fillim dhe ‘sekreti’ per dashurine tende, per Dorin qe me pas te pikturoi jeten me portretin e Esieles e vogel qe tu be motivi i jetes. Ishit te gjithe bashke Nje pse e madhe, nje boshllek i madh, nga nje termet i madh. Zemren e kam plage! Nje faleminderit per te gjithe ju qe me keni shkruar dhe me keni qendruar afer cdo moment me dashurine dhe dashamiresine tuaj. Zoti ju bekofte” (sic.), ka shkruar Evi Reçi në Facebook.

Evi Reçi njihet si interpretuese e disa këngëve shumë të suksesshme shqiptare ndër vite, të cilat janë pritur mirë nga publiku.

E njëjta tash e sa kohë ushtron edhe pozitën e prezantueses në emisionin “Vizioni i Pasditës” në Vizion Plus, por që prej ngjarjes nuk është shfaqur për shkak të tragjedisë së përjetuar. /Telegrafi/