Maqedoni, rriten ankesat për shqetësim në vendin e punës

Sivjet ka rritje enorme prej mbi 50 për qind të numrit të ankesave për diskriminim apo më saktë për shqetësim në vendin e punës, për shkak të bazave të ndryshme. Qytetarët edhe sivjet më tepër janë ankuar në punën e pushtetit gjyqësor, thotë Avokati i Popullit, Ixhet Memeti, në intervistën javore të Radio Evropa e Lirë.

“Shpesh herë gjyqësori dhe shërbimet konsumatore i kanë ndryshuar vendet. Sivjet, 2019, karakterizohet si viti në të cilin qytetarët më tepër ankohen në punën e pushtetit gjyqësor, por këtu janë edhe fushat e tjera, si të drejtat e fëmijës, të drejtat sociale, më tej marrëdhëniet e punës dhe diskriminimi. Është shumë interesant se sivjet, në mënyrë enorme, mbi 50 për qind është rritur numri i ankesave për diskriminim apo më saktë për shqetësim në vendin e punës, për shkak të bazave të ndryshme. Ne si institucion është vështirë të vijmë ta hulumtojmë rastin dhe është vështirë të kemi afekt. Diku 12 shkelje të këtilla janë konstatuar, vetëm në tre janë pranuar rekomandimet tona, derisa në tetë shkelje të tjera na mbetet t’i drejtojmë qytetarët të kërkojnë mbrojtje gjyqësore. Sikur të mos ketë përparim të dukshëm në krahasim me vitin 2018 edhe krahas kësaj që më tepër pranim të rekomandimeve të përgjithshme kemi te rekomandimet individuale si të ngecë pranimi”, thekson Memeti.

Ai shton se më tepër ankesa marrin për vonesë të procedurave gjyqësore. “Sivjet kemi katër procedura ku veprojmë si mik të Gjykatës. Kjo është një kompetencë shumë interesante që e mori institucioni Avokati i Popullit i cili është sfidë e madhe, shumë duhet të bashkëpunojmë me pushtetin gjyqësor, sepse kemi probleme të mëdha, ato nuk na pranojnë. Thjesht nuk duan ta pranojnë institucionin si mik të Gjykatës, ata harrojnë se ne nuk e shkelim pavarësinë e tyre, ne u ndihmojmë atyre, në mënyrë më të lehtë dhe më cilësore të marrin vendime gjyqësore, me çfarë faktet tona që i kemi apo mendimet tona që i kemi lidhur me punë të caktuara ua japim atyre”, shton Avokati i Popullit.