Rrethrrotullimi i ri në Tetovë nuk do të bëhet këtë vit

Më 13 nëntor të vitit të kaluar, këshilli i Komunës së Tetovës kishte sjellë vendim për ndërtimin edhe të një rrethrrotullimi në Tetovë. Bëhet fjalë për rrethrrotullimin në bulevardin e Rrugës Industriale me rrugën “29 Nëntori” për të cilën në këshillin komunal kishin votuar edhe këshilltarët e opozitës. Por, që atëherë e këndej, punët në teren nuk kanë filluar. Sipas informacioneve nga Komuna e Tetovës, edhe në këto muaj që kanë mbetur deri në fund të vitit, nuk do të fillojnë punët.

“Këtë vit nuk do të fillojë ndërtimi i rrethrrotullimit. Jemi të fokusuar në vazhdimin e bulevardit në rrugën industriale dhe Bllagoja Toska”, thonë shkurt nga Komuna e Tetovës. Por edhe për një kohë të shpejtë nuk do të fillojë të ndërtohet edhe vazhdimi i bulevardit në rrugën industriale. “Momentalisht jemi duke punuar në projektin për këtë bulevard. Gati se një muaj do të shkojnë procedurat rreth hapjes së tenderit dhe pas zgjedhjes së firmës, do të fillojnë punët”, bëjnë të ditur nga Komuna e Tetovës.

Rrethrrotullimi në këtë rrugë shihej si një mundësi e mirë për zgjidhjen e kaosit në këtë pjesë të qytetit të Tetovës, por do të pres kohë më të mirë. Në ndërkohë, sa i përket vazhdimit të bulevardit “V.S Bato”, që njihet si bulevardi në rrugën industriale, tashmë Komuna e Tetovës ka siguruar mjetet e nevojshme. Kjo është bërë e ditur disa ditë më parë nga kryetarja e Komuës së Tetovës, Teuta Arifi, pasi që kishte nënshkruar marrëveshje me ministrinë e financave për marrjen e mjeteve, si pjesë e kredisë nga Banka Botërore në drejtim të kostos së përmirësimit të shërbimeve komunale.

“Këshilli i Komunës së Tetovës solli vendim për zbatimin e projektit kapital për ndërtimin e seksionit të ri të “Bulevardit Vidoe Smilevski Bato” në gjatësi prej 671 metra. Ky projekt është me prioritet për Komunën e Tetovës. Bulevardi që planifikohet të ndërtohet është i përfshirë në Planin Gjeneral Urbanistik dhe Planin Detal Urbanistik, si dhe në Strategjinë për zhvillim ekonomik lokal dhe Programin vjetor për trafik, rrugë dhe tokë ndërtimore. Bulevardi “Vidoe Smilevski Bato” është i rëndësishëm për trafikun në Tetovë, sepse siguron lidhjet midis tri rrugëve të rëndësishme në Tetovë. Ky bulevard lidh rrugën për në Shkup, Gostivar dhe Jazhincë. Për më tepër, zbatimi i projektit do të sigurojë përfitime të konsiderueshme si: rritjen e cilësisë së jetës, sigurinë më të mirë në trafik, sigurimin e një komunikimi më të mirë dhe do të promovojë potencial më të lartë për zhvillim ekonomik me një infrastrukturë më të mirë rrugore”, tha Teuta Arifi, kryetare e Komunës së Tetovës, pas nënshkrimit të marrëveshjes me Ministrinë e Financave për marrjen e mjeteve.

Ajo më tej tha se “duke pasur parasysh objektivat strategjike për zhvillimin e sistemit të transportit urban në komunë, si një kontribut për mbrojtjen e qëndrueshme të mjedisit jetësor duke zvogëluar emetimet e dëmshme, zhurmën, ndryshimet klimatike dhe efikasitetin e energjisë dhe duke kontribuar në zhvillimin ekonomik përmes lëvizjes dhe qasjes në të gjitha pjesët e qytetit, Komuna e Tetovës planifikon të ndërtojë një pjesë të re këtij bulevardi”, u shpreh kryetarja Arifi.

Në ndërkohë, unaza në këtë pjesë që ishte planifikuar, nuk dihet se kur do të fillojë të ndërtohet, ngase nga Komuna nuk kanë dhënë afat për fillimin e punëve brenda këtij vitit./Koha/