Pacolli hap kryesimin e Kosovës në SEECP: Vendi ynë i përkushtuar për paqe në rajon, kemi tri prioritete kryesore

Zëvendëskryeministri i parë dhe ministri i Punëve të Jashtme, Behgjet Pacolli, para ambasadorëve të shteteve ka hapur kryesimin e Kosovës në Procesin e Bashkëpunimit të Evropës Juglindore, SEECP, dhe ka prezantuar prioritetet e Kosovës gjatë këtij kryesimi.

Pacolli në hapje ka thënë se kjo është një detyrë e rëndësishme për Kosovën, pasi që sipas tij po ndodhë në të njëjtin vit kur Kosova ka marrë kryesimin e Fondit të Ballkanit Perëndimor (WBF) dhe me Iniciativën Rajonale të Migracionit, Azilit dhe Refugjatëve (MARRI).

“Kjo po ndodhë pasi që Kosova po njihet si partnere e besueshme në rajon. Kosova iu bashkua kuadrit të SEECP në Samitin e Bukureshtit në 2014, dhe jemi të lumtur që do të kryesojmë këtë strukturë rajonale për periudhën e ardhshme. Kjo është struktura e vetme politike që rrjedh nga iniciativa e vetë vendeve të rajonit me qëllimin e vetëm që të iu mundësoj anëtarëve të saj afrimin drejt strukturave evropiane dhe euroatlntike, forcimit, dhe transformimit në një zonë të paqes”, ka thënë ai, transmeton Telegrafi.

Sipas tij Kosova synon të kontribuoj për mjedis të paqes, sigurisë dhe marrëdhënieve të mira fqinjësore.

“Kryesimi i Kosovës do të jetë një vazhdimësi e parimeve të kartes së SEECP, deklaratave të Samitit të SEECP, dhe do të bashkëpunoj ngushtë me të gjithë anëtarët. Për këtë ne kemi vendosur tri prioritete gjatë kryesimit tonë që do të përpiqemi t’i arrijmë. Këto prioritete janë:

Fokusimi në lidhshmërinë, pra përdorimi më i mirë i asaj që kemi, rrugë më të mira, lidhje më të mirë mes ekonomisë dhe njerëzve. Jemi të lumtur që janë arritur rezultat gjatë kësaj pranvere, si marrëveshja e tarifave të roaming mes gjashtë shteteve, por ne do të bëjmë përpjekje edhe për fusha të tjera.
Fokusi tek rinia, si rajon në përgjithësi ne kemi filluar ta identifikojmë rininë si një nga asetet kryesore të shoqërtisë sonë. Ndalimi i ikjes së trurit dhe rritja e mobilitetit të të rinjve me rajonin dhe BE-në është prioritet kyç. Kemi ndërmarr masa ta adresojmë këtë çështje në nivel kombëtar. Çelësi i suksesit do të ishte përfshirja e të dyjave strukturave qeveritare dhe shoqërisë civile në një përpjekje drejt luftimit të këtij fenomeni.
Fokusi në kulturë dhe turizëm, Kosova dhe rajoni kanë nevojë të madhe për ribrendim, rizhvilim dhe rindezje të potencialit të tyre të vërtetë turistik dhe kulturorë. Ne kemi shumë gjëra të bukura në Kosovë dhe rajon. Promovimi i kulturës, artistëve të rinj dhe turizmi , është prioritet kyç ku synojmë ta sjellim Kosovën më afër rajonit dhe botës”, ka thënë ai.

Pacolli ndër të tjera ka folur edhe për prioritetet e procesit të integrimit në BE.

“Procesi i integrimit në BE mbetet synimi ynë kryesor që gjatë kryesimit të SEECP do të listojmë prioritetet tona. Do të mundohemi të ndërtojmë sienergji të reja, edhe me Finlandën gjatë presidencës së tyre në Këshillin e BE-së, dhe Kroacinë”, është shprehur ai duke përmendur ngjarjen e fundit në kuadër të SEECP, ku Kosova nuk mori pjesë.

“Aktiviteti përfundimtar i SEECP i organizuar nga Bosnja e Hercegovina ku pozita e Kosovës nuk është respektuar, dhe Kosova nuk është trajtuar si të gjitha shtetet tjera anëtare. Kjo mund të ishte shmangur me vullnet të mirë politik dhe koordinim mes shteteve. Megjithatë Kosova është e përkushtuar të jetë partner kredibil në rajon dhe në harmoni të plotë me misionin kryesor të SEECP. Politika e BE-së për fqinjësi të mirë do të prezantohet në mënyrën më të mirë të mundshme gjatë kryesimit tonë”, ka thënë ai.

Kujtojmë se vendet anëtarë të SEECP janë Kosova, Shqipëria, Bosnje dhe Hercegovina, Turqia, Maqedonia e Veriut, Kroacia, Mali i Zi, Sllovenia, Bullgaria, Greqia, Moldavia, Rumania dhe Serbia./Telegrafi/