Raufi: “Bombat” për rastin “Monstra” do të tregojnë të vërtetën

Avokati i të akuzuarve për rastin “Monstra”, Naser Raufi, pas njoftimeve të prokurores speciale Fatime Fetai, se do të kërkojë të dëgjohen “bombat” për këtë rast, tha se përmes materialeve të përgjuara do të konfirmohet se personat e akuzuar nuk e kanë kryer vrasjen.

“Neve si mbrojtje na gëzon që PSP i paralajmëroi ‘bombat’, gjegjësisht se edhe ato do të jenë pjesë e dëshmive. Shpresojmë që ‘bombat’ do të na ndihmojnë të dëshmojmë atë që e kemi deklaruar deri tani”, tha Raufi, përcjell Telegrafi Maqedoni.

Ai theksoi se edhe ata si mbrojtje do t’i përdorin përgjimet e paligjshme si dëshmi të tyre, me qëllim që të tregojnë se të akuzuarit nuk e kanë kryer veprën.

“Sigurisht edhe ne do t’i përdorim ato biseda. Kemi të drejtë ‘bombat’ të jenë pjesë edhe e dëshmive tona. Mendoj se me dëgjimin e këtyre materialeve do të vijmë tek e vërteta”, tha Raufi.

Ndryshe, në seancën e sotme u vendos që të bëhet ekspertizë e 31 celularëve dhe të dëgjohen “bombat” me propozim të PSP-së.

Për vrasjen e pesëfishtë në Liqenin e Smilkovës më 12 prill 2012, ku u gjetën të vrarë: Kire Triçkovski, Filip Slavovski, Cvetanço Ackovski, Aleksandar Naqevski dhe peshkatari Borçe Stefanovskio, me burgim të përjetshëm janë dënuar të akuazaurit Alil Demiri, Afri dhe Agim Ismajloviq, Ezim dhe Haki Aziri si dhe Sami Luta.

Gjykata Supreme në dhjetor të 2017 ka ndërprerë aktvendimet, dhe ka liruar nga burgu të dënuarit: Agim Ismajloviq, Haki Aziri, Sami Luta dhe Fejzi Aziri, ku u caktoi masë kujdesi. Pas shfuqizimit të akvendimit, rastin “Monstra” e ka marrë përsipër PSP-ja, ku u kthye për rigjykim./Telegrafi/

Lexo po ashtu Rasti “Monstra”, do të bëhet ekspertizë e 31 celularëve dhe do të dëgjohen “bomba” në seancë