Hamza nënshkruan vendimin për reduktimin e normave tatimore për kafshët dhe shpendët e gjalla

Në kuadër të reformave fiskale për përmirësimin e kushteve të favorshme të të bërit biznes, ministri i Financave, Bedri Hamza sot ka nënshkruar vendimin për reduktimin e normës së Tatimit të Vlerës së Shtuar nga 18 përqind në 8 përqind për kafshë të gjalla dhe shpendë të gjallë sipas Kodeve tarifore të Doganës nga 0102 deri në kodin tarifor 0106.

“Ky vendim, është në vazhdën e vendimeve të shumta të cilat janë marr nga ministri Bedri Hamza në politika fiskale për lirim nga tatimi doganor dhe akcizës që kanë për qëllim krijimin e kushteve të favorshme për të bërë biznes përkatësisht për zhvillim të prodhimtarisë në vendin tonë me qëllimin e vetëm të zhvillimit të mirëqenies së qytetarëve të Republikës së Kosovës.

Ministri i Financave do të vazhdojë edhe më tutje me reformat në politikat fiskale, për ta rritur zhvillimin e sektorit privat në Kosovë, si faktor kyç i zhvillimit ekonomik të vendit”, thuhet në njoftimin për media.

Ky vendim hyn në fuqi më 1 korrik të vitit 2019. /Telegrafi/