Crnadak: Bosnja nuk do ta njohë Kosovën

Ministri i Jashtëm i Bosnjë dhe Hercegovinës Igor Crnadak tha sot se beson që Këshilli i Ministrave të këtij vendi në përbërjen e tanishme nuk do të njohë pavarësinë e Kosovës dhe as të vendosë mbi Planin e Veprimit të Anëtarësimit në NATO.

“Ne nuk kemi dashur të flasim për njohjen e Kosovës në katër vjetët e fundit dhe ndërsa unë jam në Këshillin e Ministrave të BeH, Kosova nuk do të njihet, pasi ky është qëndrimi edhe i dy ministrat e tjerë që vijnë nga Republika Serbe”, tha Crnadak, duke shtuar se ky qëndrim do të mbahet në periudhën e ardhshme.

Ai tha se nuk do të ndryshojë as qëndrimi i tyre mbi Planin e Veprimit të Anëtarësimit në NATO.

“Megjithëse ekziston një vendim i Presidencës së BeH të vitit 2009, i cili u miratua unanimisht, për shkak të atmosferës së përgjithshme që ekziston në publik, qëndrimi që ne përfaqësojmë Republikën Serbe në Këshillin e Ministrave të BeH është i qartë dhe nuk do të ndryshojë pavarësisht se kush po fliste dje në takimin në Berlin”, tha Crnadak, përcjell KP.

Siç tha ai, një angazhim i përbashkët gjermano-francez është një gjë jashtëzakonisht e mirë dhe një sinjal inkurajues për të gjithë rajonin.

“Shpresoj se në periudhën e ardhshme do të bëjmë një qasje më intensive për zgjidhjen e marrëdhënieve midis Beogradit dhe Prishtinës dhe se BeH do të japë një nxitje shtesë evropiane”, tha Crnadak.

Dy gjëra ishin zhgënjyese për të, siç theksoi ai, pasi nuk pati një qëndrim të vendosur lidhur me nevojën për shfuqizimin e taksës 100 për qind mbi produktet nga BeH dhe Serbia./Telegrafi/