Haradinaj: Ftoj qytetarët e komunave veriore të dalin në zgjedhje dhe të votojnë për kandidatët më të mirë

Kryeministri i Kosovës, Ramush Haradinaj, pas vendimit të Presidentit të Republikës së Kosovës, për shpalljen e zgjedhjeve në komunat veriore, ka ftuar subjektet politike të shfrytëzojnë të drejtën e tyre kushtetuese për të përfaqësuar interesat e qytetarëve.

Haradinaj në një postim në llogarinë e tij në Facebook, u ka bërë thirrje qytetarëve për të dalë në këto zgjedhje.

“Pas vendimit të Presidentit të Republikës së Kosovës, për shpalljen e zgjedhjeve në Komunat e Zubin Potok, Zveçan, Leposaviq, dhe Mitrovicë e Veriut, ftoj subjektet politike të cilat garojnë në zgjedhjet e 19 Majit 2019, ta shfrytëzojnë të drejtën e tyre kushtetuese për të përfaqësuar interesat e qytetarëve, duke marrë pjesë në këto zgjedhje.
Gjithashtu ftoj qytetarët e këtyre Komunave për të dalë në këto zgjedhje dhe të votojnë kandidatët më të mirë, që do të punojnë në të mirën e qytetarëve të këtyre komunave.
Bëj thirrje për zgjedhje të lira dhe demokratike, bazuar në Kushtetutën dhe ligjet tona dhe standardet më të larta demokratike ndërkombëtare”, ka shkruar Haradinaj.

Lexo po ashtu Presidenti shpall zgjedhjet për kryetarë në katër komunat veriore

Ndryshe sot Presidenti i Republikës së Kosovës, Hashim Thaçi, ka shpallur zgjedhjet e jashtëzakonshme për kryetarë në katër komunat, Mitrovicë e Veriut, Zubin Potok, Leposaviq dhe Zveçan./Telegrafi/