Gjuriq: Miratimi i platformës do të thotë fundi i dialogut

Drejtori i të ashtuquajturës Zyrë për Kosovën në qeverinë e Serbisë, Marko Gjuriq, nuk e ka pritur mirë lajmin e miratimit të platformës për dialogun në Kuvendin e Kosovës, pasi sipas tij me këtë veprim Prishtina ka dërguar mesazh se ky është fundi i dialogut.

“Adoptimi i platformës që parasheh si rezultatin e vetëm të mundshëm të dialogut njohjen, pa trajtuar të drejtat dhe pozitën e serbëve, tregon se Prishtina në këtë mënyrë ka dërguar mesazhin se ky është fundi i dialogut”, ka deklaruar Gjuriq para gazetarëve, transmeton Telegrafi.

Gjuriq beson se vendimi i autoriteteve në Prishtinë e kanë vënë Serbinë në pozitën më të vështirë që nga viti 2011. Megjithatë ka pranuar se presidenti i Serbisë, Aleksandar Vuçiq, ka ftuar për nesër takim urgjent të Këshillit për siguri kombëtare.

Ai gjithashtu beson se Serbia do të dijë që në mënyrën e duhur t’i përgjigjet kësaj sfide, dhe të mbrojë interesat kombëtare, pozitën dhe të drejtën e serbëve në Kosovë dhe Serbi. /Telegrafi/