Mustafa: Koalicioni qeverisës po e kolapson Kosovën

Kryetari i Lidhjes Demokratike të Kosovës (LDK), Isa Mustafa ka thënë se koalicioni qeverisës i cili rrihte gjoks se do të merr vendime të mëdha është duke e vënë vendin në kolaps.

Mustafa në një postim në rrjetin e tij social Facebook shkruan se koalicioni qeverisës dështoi në liberalizimin e vizave, në anëtarësimin e Kosovës në Interpol, dështoi me kontratën e Kosovës së Re, etj.

Ai po ashtu shtoi se korrupsioni, sipas matjeve ndërkombëtare është në rritje si dhe marrëdhëniet me Shtetet e Bashkuara të Amerikës (SHBA) dhe Bashkimin Evropian (BE), janë përkeqësuar.

Lexoni më poshtë postimin e tij të plotë:

“Koalicioni, që rrihte gjoks se do të merr vendime të mëdha, po e kolapson Kosovën.

Po mbushen tre javë me shkolla e fakultete te mbyllura, e këta vazhdojnë të bëjnë pazare;

Mijëra pacient presin për tu operuar, ndërkaq kirurgët vazhdojnë grevën;

Të pakënaqur me paga shprehen edhe gazetarët e RTK-së, doganierët, infermierët, punonjësit e shërbimit korrektues…

PSD e shantazhon Qeverinë me Ligjin për paga, Ligjin për dialogun, shkarkime e ngarkime… ashtu siç e shantazhonte Lista Serbe;

Po hyjmë në muajin e tretë, që katër komuna në veri nuk e pranojnë sovranitetin shtetëror;

Ky koalicion dështoi në liberalizimin e vizave, në anëtarësimin e Kosovës në Interpol, dështoi me kontratën e Kosovës së Re, sepse u tërhoq financuesi kryesor – Banka Botërore, po e shkatërron Telekomin me punësime partiake sikurse edhe ndërmarrjet e tjera publike;

Ky është koalicioni me Qeverinë me 1/3 e ministrave me aktakuza me mbi 80 zëvendësministra;

Ky koalicion ia humbi Kosovës 13 njohje;

Korrupsioni, sipas matjeve ndërkombëtare është në rritje;

Marrëdhëniet me SHBA dhe BE janë përkeqësuar.

E gjithë kjo nuk habitë. Janë këta të njëjtit që për dy vite e gjysmë e kallën Kosovën, erdhën në pushtet me dhunë; kundërshtuan Marrëveshjen për demarkacionin deri sa erdhën në pushtet; janë të njëjtit që organizuan anulimin e Ligjit për Gjykatën Speciale, por nuk arritën, në dhjetor të vitit 2017 dhe që nuk mërziteshin as për BE-në e as për SHBA-të.

Kosova nuk duhet t’ia besoj edhe më tutje këtij koalicioni qeverisjen e vendit; nuk duhet t’ia besoj dialogun për marrëveshjen përfundimtare me Serbinë, nuk duhet t’ia besoj arkën e shtetit…

Qeverisja e këtij koalicioni, në krye me PDK-në, është e dëmshme për Kosovën”. /Telegrafi/