Doli numri i fundit për këtë vit i revistës “Jeta e Re”

Ka dalë numri i ri i revistës letrare të traditës “Jeta e re”, i fundit për këtë vit. Në këtë numër janë përkujtuar Fatos Arapi dhe Ragip Sylaj, dy shkrimtarë që u shuan në 2018.

Në njoftimin për këtë numër tregohet se ai fillon me një shënim biobibliografik për Arapin dhe vazhdon me shkrimin e poetit dhe të studiuesit Basri Çapriqi me titullin “Arapi-krijues origjinal i një rrethi të simboleve”, për të vazhduar me një cikël poetik përzgjedhur nga libra e tij me poezi. Ndërkaq, për Ragip Sylajn është shkrimi i Arben Veselajt me titullin “Murgu i një brezi letrar” dhe cikli poetik me titullin “Letër Ragip Sylajt në Sllapuzhan”.

Në rubrikën Ligjëratë, është një ligjëratë e T.S. Eliotit me titullin “Ç’është poezia minore”, mbajtur në 1944 në qytetin Svuensi, para Shoqatës së njerëzve të librave.

Rubrika e prozës nis me autorët tanë. Ardian Kyçyku vjen me prozën “Kafaz”, kurse Bajram Karabolli, prozatori dhe përkthyesi ndër më shquarit nga letërsia hispanoamerikane, me tregimet “Shpirtvrasësit” dhe “Emrat e mi”. Kurse Sali Bytyçi me “Njeriu që privatizojë pellazgët hyjnorë” dhe “Njeriu që iu kishte përmbysur bota”. Prej autorëve të huaj në këtë numër të revistës është Primo Levi me “Sistemi periodik” dhe “Arsenik” dhe Alix Epstein me një sërë tregimesh të shkurtra.

Rubrika e poezisë nis me një cikël poezish të poetit, kritikut dhe dramaturgut anglez Wyston Hugh Auden, për të vazhduar me poetin italian Sando Penna, me Allen Gisbergun, njërin ndër poetët më të rëndësishëm, më popullorë dhe më të përkthyer amerikanë të shekullit XX, pastaj me poetin, eseistin dhe kritikun tjetër italian Franko Fortinin dhe poetin shumë të njohur uruguaian Eduardo Goleano. Me nga një cikël poezish janë prezantuar edhe janë edhe disa nga autorët tanë, si: Musa Ramadani, Sali Bashota, Entela Tabaku, Ndue Ukaj dhe Fatmire Duraku.

Në rubrikën Dossier vjen shkrimtari, kritiku dhe filozofi amerikan William H. Gass. Ky autor është prezantuar me prozat “Citime nga kryetari Flober” dhe “Bletët në verë”, me intervistën me titullin “Aty ku qëllimi është përsosuria – dështimi është rregull”, për të përfunduar me një vështrim të autores H. L. Hix për romanin “Tuneli” me titullin “ Libër me plot metafora”.

Në rubrikën e kritikës janë prezantuar autorë tanë dhe të huaj. Rubrika nis me tekstin “Poetika, e kaluara dhe e ardhmja” e Tzvetan Todorovit, për vazhduar me “Kultura të ndryshme, kode të ndryshme” të Jurij Llotmanit, “Mirce Eliade” të Emil Cioranit. Nga autorët tanë kemi tekstet: “Drama e ritualit” i Agron Gashit, “Minimalizmi në letërsi’ i Meliza Krasniqit dhe “Lirika erotike e Azem Shkrelit” i Serafina Lajçit.

Përkthyesit që kontribuuan në këtë numër janë: Alket Çani, Belfjore Qose, Arben Idrizi, Meliza Krasniqi, Erion Karabolli, Kujtim Morina, Fadil Bajraj, Alfred Beka, Qerim Ondozi, Arta Hallaçi dhe Demë Topalli.