Si erdhi në pushtet Angela Merkel, gruaja e parë që në historinë e Gjermanisë arriti të bëhet kancelare (Foto)

Kancelarja gjermane Angela Merkel ka deklaruar këto ditë se ka ardhur koha për një kapitull të ri, dhe ka paralajmëruar se nuk do të kandidojë më për kancelare e as për kryetare të partisë CDU.

“Ka ardhur koha t’ua kumtojë një vendim të rëndësishëm që e kam marrë. Nuk do të kandidohem më për kryetare të CDU-së në zgjedhjet e ardhshme që do të mbahen në dhjetor. Ky është mandati im i katërt në krye të qeverisë, dhe hera e fundit si kancelare. Nuk do të kandidohem për kancelare në zgjedhjet e vitit 2021, por as për deputete në Bundestagun gjerman. Gjithashtu nuk planifikojë të kryej kurrfarë funksioni tjetër politik”, ka deklaruar Merkel, transmeton Telegrafi.

Ajo ka pranuar se kishte menduar mirë se si mund të japë kontributin e saj për Gjermaninë dhe partinë.

“Tash e 18 vite jam kryetare e partisë CDU dhe 13 vite kancelare. Kur më 30 maj të vitit 2005 njoftova se do të kandidojë për kancelare, kam thënë se dua t’i shërbejë Gjermanisë. T’i shërbesh Gjermanisë dhe qytetarëve është detyrë e rëndësishme. Jam falënderuese që kam pasur rastin që për një kohë të gjatë ta bëjë një të tillë”, ka shtuar Merkel.

Kur në vitin 2005, Merkel u bë kancelarja e parë (femër) në historinë e Gjermanisë, shumë persona suksesin e saj e kanë parë si dëshmi se nuk duhet nënvlerësuar kundërkandidati për të parin e vendit.

Në konferencën e parë për media si mandatare për formimin e qeverisë në vitin 2005, Merkel kishte vështirësi të fsheh emocionet edhe përkundër faktit që disa gazetarë të huaj u munduan t’i “nxjerrin” informacione, kur u pyet se si ndihet pasi është zgjedhur kancelarja e re e Gjermanisë.

“Si po ndiheni, të lutem na tregoni”, insistonte një gazetar danez, por Merkel ishte përgjigjur shkurt “mirë jam, jam në disponim”, duke shtuar se është shumë e koncentruar për pyetjet rreth koalicionit qeverisës në qeverinë e saj të parë që do ta udhëheq.

Në maje të politikës gjermane ajo nuk ishte ngjitur hapë pas hapi nëpër strukturat e partisë. Për politikë kishte filluar të shpreh interesimin vetëm pas rënies së komunizmit, kurse në skenën politike për herë të parë ishte shfaqur në publik si zëvendëse e zëdhënëses së partisë së parë demokrastike të Gjermanisë Lindore, kurse në maje të politikës gjermane të ngjitet e ndihmoi Helmut Kol.

Pas bashkimit të dy Gjermanive, Kol e emëroi Merkelin si Ministre për punësimin e grave dhe të rinjve. Por, pasi Kol humbi ndaj rivalit politik nga SPD-ja, Gerhard Shroder në zgjedhjet e vitit 1998, lideri i CDU-së, Wolfgang Shojble e emëroi Merkelin sekretare të përgjithshme të partisë.

Por pas pretendimeve rreth donacioneve të kundërligjshme dhe mbledhje së fshehtë të një shume të parave, me të cilat Kol financonte partinë në vitin 1999, mbrojtësja e tij më e madhe ishte ajo që kërkoi nga ai të tërhiqet, dhe kështu më 10 prill të vitit 2000 u bë gruaja e parë në krye të demokristianëve.

Merkel ka studiuar fizikën në Lajpcig, kurse doktoraturën e ka mbrojtur në Akademinë e Shkencave në pjesën lindore të Gjermanisë. Doktoraturën e ka mbrojtur te profesori Joachim Saur në vitin 1986, i cili disa vite më vonë u bë bashkëshorti i saj. /Telegrafi/