Sada: Viktimat e dhunës seksuale ende ndjehen të paragjykuara

Drejtoresha ekzekutive e organizatës “Medica Gjakova”, Mirlinda Sada ka deklaruar se shumica e viktimave të dhunës seksuale në Kosovë janë të stigmatizuara nga shoqëria.

Ajo në emisionin “Përballje” me Muhamet Hajrullahun që transmetohet në RTV Dukagjini ka thënë se rastet janë të vështira dhe viktimat nuk dallojnë nëse vijnë nga fshati apo qyteti.

Sada thotë se është problematike afati i caktuar prej 5 vjetësh, për të kryer aplikimin nga viktimat.

“Kufizimi prej 5 vjetësh është pak problematik”.

Drejtoresha e institucionit që pranon aplikacione dhe merret me trajtimin e viktimave të dhunimit seksual, thotë se për shkak të procesit të vështirë, ka raste kur duhen dy vite të kompletohet rrëfimi apo dëshmia e viktimave.

“Është proces shumë traumatik, ne si psikologe e kemi të vështirë t’i detyrojmë të na rrëfejnë detajet, prandaj ndodhë që dëshmia të kompletohet pjesë pjesë dhe periudha shkon deri në dy vjet”.

Ajo thotë se shpesh personeli që pranon aplikacionet po ndihen si të jenë në rolin e hetuesit.

“Është një qasje ndryshe te plotësimi i aplikacionit, për dallim nga rrëfimet e tyre kur kanë qenë në proces të rehabilitimit të seancave psiko-sociale”.

Sada thotë se është evidente që shumë viktima për shkak të paragjykimeve sociale kanë hezituar të aplikojnë për statusin e viktimës seksuale.

“Duhet të thyejmë stigmën në shoqërinë tonë. Ka shumë viktima që ende hezitojnë të deklarohen për dhunën ndaj tyre”, deklaroi Mirlinda Sada./Telegrafi/