Hoti nga Ministria e Integrimit, optimist për vizat: Pas konsensusit në BE, hapat e tjerë janë formalitet (Video)

Agron Hoti, këshilltar politik në Ministrinë e Integrimit Evropian, ka thënë se lobimi për liberalizimin e vizave ka filluar nga muaji qershor i këtij viti dhe është krijuar një koncept dokument për këtë punë.

Hoti, në emisionin “Përballje” të gazetarit Muhamet Hajrullahu në RTV Dukagjini, ka thënë se në procesin e lobimit janë përfshirë disa institucione të Republikës së Kosovës.

“Në aspektin e lobimit (për liberalizimin e vizave) janë të përfshira: Zyra e Kryeministrit, Ministria e Integrimit Evropian, Ministria e Punëve të Brendshme… Kemi pasur takime edhe me Komisionin Parlamentar për Integrime Evropiane”.

Zyrtari nga MIE ka thënë se Kosova ka plotësuar kriteret dhe topi tashmë është në anën e BE-së.

“Drita jeshile nuk varet nga institucionet tona, por ne kemi plotësuar të gjitha kriteret dhe presim që institucionet e BE-së të reflektojnë”, tha Hoti, përcjell Telegrafi.

Ai ka thënë se ne kemi humbur tri vite, pasi, sipas tij, me procesin e demarkacionit kemi humbur mundësinë të futemi në pako me Gjeorgjinë dhe Ukrainën.

“Kombinatorikat në BE atë kohë kanë qenë shumë më të lehta se që i kemi sot”.

Ai ka thënë ka thënë se institucionet e Kosovës janë në takime të vazhdueshme me zyrtarë të shteteve të BE-së.

“Është duke u ndërtuar një konsensus në BE, nuk po them se është kryer, por pas këtij konsensusi, hapat e tjerë janë formalitet”.

Zyrtari nga Ministria e Integrimit Evropian ka thënë se është e rëndësishme që në procesin e liberalizimit të vizave të kemi një strategji të shkruar në letër.

Por, me këtë ide nuk është pajtuar Demush Shasha nga instituti EPIK, duke e konsideruar strategjinë në letër krejtësisht të panevojshme, përderisa nuk ka veprime konkrete në luftimin e krimit dhe korrupsionit.

Duke folur për largimin e të rinjve nga Kosova, Agron Hoti, ka thënë se ky problem nuk është aktual vetëm në Kosovë, por edhe në tërë vendet e Ballkanit, e sidomos nga vendet e ish-Jugosllavisë.

“Mungesa e industrisë në këto vende ballkanike, përfshirë edhe Kosovën, po ndikon për lëvizjen e punëtorëve drejt vendeve të pasura të BE-së”, tha ai përcjell Telegrafi.

Zyrtari nga MIE ka thënë se në bazë të disa sondazheve të organizuara, me mbështetjen e GIZ-it gjerman, një përqindje e vogël e kosovarëve do të emigronin në BE.

“Nga anketa e GIZ-it, 83 % e kosovarëve e dinë se sa kanë të drejtë të qëndrojnë në vendet e BE-së. Nga kjo anketë vetëm 6.1 % e shohin liberalizimin e vizave si mundësi për të shkuar në BE e për të punuar”.

Hoti ka thënë se shumë persona nga Portugalia, Spanja apo Turqia, që kanë emigruar në Gjermani, sot po kthehen në vendet e tyre.

“Ka ankesa nga Gjermania se shumë qytetarë të atij vendi [Turqisë] po kthehen në Turqi, duke dëmtuar ekonominë e Gjermanisë”, tha Agron Hoti./Telegrafi/