Besa Luzha thotë se Vuçiqi mund të jetë më i lehtë për marrëveshje me Kosovën (Video)

Njohësja e rrethanave politike dhe analistja, Besa Luzha, ka thënë se nuk duhet harruar se cilit grupim politik i ka takuar Vuçiqi dhe nuk duhet pritur që ai të heq dorë nga tezat e Millosheviqit dhe Sheshelit.

Ajo në emisionin “Debat Plus” në RTV Dukagjini deklaroi se ndonjëherë në demokraci zgjedhjet u mundësojnë edhe personave me ide si Vuçiqi të marrin pushtetin.

“Ata kur e marrin pushtetin mundohet të realizojnë aspiratat nga një perspektive tjetër. As që është pritur që Vuçiqi të heqë dorë nga ajo që kanë përfaqësuar Millosheviçi apo Shesheli”.

Analistja ka thënë se kjo mund të jetë diçka e mirë për Kosovën pasi nuk ka kush i kundërshton më këto pikëpamje më ekstreme, në rast të arritjes së ndonjë marrëveshje.

“Në raport me Kosovën gjithmonë është ajo teoria se kur i vendos në dialog ata që janë më ekstremistët, nuk ka kush pas tyre të kundërshtoj diçka më tepër, kështu që zgjidhja arrihet më lehtë kur i ke në tavolinë dy ekstremet”, ka thënë Luzha duke shtuar se, “edhe te ne ka pasur zëra që është më mirë të negociojë dikush si Vetëvendosje për shkak të pikëpamje më ekstreme, që ka më shumë kushte”.

Luzha ka thënë se nga vizita dhe fjalimi i Vuçiqit në Kosovë megjithatë janë nxjerrë disa konkluzione, “ndër më kryesorit vërehet se Serbia vazhdon të ketë lidhje më të forta me Rusinë se me Evropën”.

“Aleanca e Serbisë me Rusinë është më e fortë se me Evropës, mesazhi i dytë është se ata nuk e kanë prioritet anëtarësimin në NATO por për shkak të aleancës me Rusinë ata duan të jenë një tampon zone mes dy aleancave, ose për ta rritur pazarin”, tha Luzha.

Luzha ka thënë se çdo sukses në bisedime, BE-ja ja ka faturuar Serbisë.

“Përkundër luftërave që ka bërë Serbia, ajo është më afër BE-së se vendet siç janë Bosnja apo Kosova që kanë qenë viktima të këtyre luftërave”, tha Luzha./Telegrafi/